خیبرپختونخوا،سیلاب متاثرہ اضلاع میں وبائی امراض پھیلنے لگے

سانپ ، کتوں کے کاٹنے کے 35سے زائد واقعات ،نزلہ، زکام ، سانس کی بیماریوں کے 2ہزار 245مریض رپورٹ

ہفتہ 23 اگست 2025 17:53

پشاور(اُردو پوائنٹ اخبارتازہ ترین - این این آئی۔ 23 اگست2025ء)خیبرپختونخوا کے سیلاب سے متاثرہ اضلاع میں وبائی اور موسمی امراض تیزی سے پھیلنے لگے ۔محکمہ صحت کی رپورٹ کے مطابق متاثرہ علاقوں میں پیٹ و آنتوں کی بیماریوں، ہیضہ، ملیریا، ڈینگی، جلدی امراض اور سانس کی بیماریوں کے ہزاروں کیسز رپورٹ ہوئے ہیں۔دستاویز کے مطابق صرف ڈائریا کے 11اضلاع سے 2ہزار 506کیسز رپورٹ ہوئے جن میں دیر لوئر سے سب سے زیادہ 823، سوات سے 591، بونیر سے 319اور باجوڑ سے 262کیسز شامل ہیں۔

دیگر اضلاع میں بھی درجنوں کیسز سامنے آئے ہیں۔ رپورٹ کے مطابق متاثرہ علاقوں میں خونی پیچش کے 116مریض جبکہ ملیریا کے 123کیسز رپورٹ ہوئے۔محکمہ صحت کے مطابق ڈینگی کے بھی 15کیسز رپورٹ ہوئے ہیں جن میں صوابی میں 8، دیر لوئر میں 6اور باجوڑ میں ایک کیس شامل ہے۔

(جاری ہے)

متاثرہ علاقوں میں خارش اور دیگر جلدی امراض کے سینکڑوں مریض بھی سامنے آئے ہیں۔ دستاویز کے مطابق تورغر میں 172، دیر لوئر میں 125اور شانگلہ میں 128جلدی امراض کے مریض رجسٹرڈ ہوئے۔

رپورٹ میں بتایا گیاہے کہ سانپ اور کتوں کے کاٹنے کے 35سے زائد واقعات پیش آ چکے ہیں، جبکہ متاثرہ علاقوں میں نزلہ، زکام اور سانس کی بیماریوں کے 2ہزار 245مریض رپورٹ ہوئے ہیں۔سیکرٹری صحت شاہد اللہ کے مطابق سیلاب سے متاثرہ علاقوں میں محکمہ صحت کی ٹیمیں اور موبائل اسپتال موجود ہیں اور ایک لاکھ 64ہزار سے زیادہ مریضوں کو طبی امداد فراہم کی جا چکی ہے۔ انہوں نے بتایا کہ سانپ اور کتوں کے کاٹنے کی ویکسین متاثرہ اضلاع میں بھیج دی گئی ہیں جبکہ نفسیاتی امراض میں اضافے کے باعث ماہرینِ نفسیات پر مشتمل ٹیمیں بھی متاثرہ علاقوں میں تعینات ہیں۔