دریائے ستلج میں سیلابی صورتحال، 72 دیہات زیرِ آب،شہریوں کی نقل مکانی شروع

ہفتہ 23 اگست 2025 18:15

لاہور(اُردو پوائنٹ اخبارتازہ ترین - آن لائن۔ 23 اگست2025ء) دریائے ستلج میں ہیڈ گنڈا سنگھ والا کے مقام پر اونچے درجے کی سیلابی صورتحال پیدا ہو گئی ہے، جہاں پانی کی سطح 21.30 فٹ اور بہاؤ 1 لاکھ 30 ہزار کیوسک ریکارڈ کیا گیا۔سیلاب کے باعث 72 دیہات متاثر ہونے کا خدشہ ظاہر کیا جا رہا ہے، جبکہ ہزاروں ایکڑ زرعی اراضی زیرِ آب آ چکی ہے۔ نگرا ایمن پورہ، مبوکی، بستی ابرہیم، ماہی والا، فتی والا سمیت 30 سے زائد دیہات میں زمینی رابطہ منقطع ہو گیا ہے اور مواصلاتی نظام کی بندش سے مقامی آبادی شدید مشکلات کا سامنا کر رہی ہے۔

ڈپٹی کمشنر قصور کے مطابق ضلعی انتظامیہ صورتحال پر کڑی نظر رکھے ہوئے ہے اور متاثرہ علاقوں سے انخلا کے لیے ہنگامی اقدامات جاری ہیں۔ مساجد کے ذریعے مسلسل اعلانات کرائے جا رہے ہیں تاکہ لوگ فوری طور پر محفوظ مقامات کی طرف منتقل ہو سکیں۔

(جاری ہے)

ڈپٹی کمشنر نے شہریوں کے جان و مال کے تحفظ کو اولین ترجیح قرار دیتے ہوئے دریا کے پار جانے پر مکمل پابندی عائد کر دی ہے تاکہ کسی قسم کے جانی نقصان سے بچا جا سکے۔ ریسکیو ٹیمیں، ضلعی انتظامیہ اور مقامی رضا کار امدادی سرگرمیوں میں مصروف ہیں، جبکہ حکومت نے متاثرین کو فوری ریلیف فراہم کرنے کی یقین دہانی کرائی ہے۔ ممکنہ مزید بارشوں کے پیش نظر الرٹ بھی جاری کر دیا گیا ہے۔