دریاؤں میں پانی کی صورتحال اور آبی ذخائر کی تازہ ترین رپورٹ جاری

ہفتہ 23 اگست 2025 21:05

اسلام آباد (اُردو پوائنٹ اخبارتازہ ترین - آن لائن۔ 23 اگست2025ء) واپڈا نے ملک بھر میں دریاؤں میں پانی کے بہاؤ اور آبی ذخائر کی تازہ ترین صورتحال سے متعلق رپورٹ جاری کر دی ہے۔ رپورٹ کے مطابق دریاؤں میں پانی کی آمد و اخراج کا سلسلہ تسلی بخش ہے جبکہ تربیلا، منگلا اور چشمہ کے ریزروائرز میں مجموعی طور پر ایک کروڑ 14 لاکھ 37 ہزار ایکڑ فٹ قابلِ استعمال پانی موجود ہے۔

ترجمان واپڈا کے مطابق تربیلا کے مقام پر دریائے سندھ میں پانی کی آمد ایک لاکھ 83 ہزار 900 کیوسک جبکہ اخراج 2 لاکھ 6 ہزار 700 کیوسک ریکارڈ کیا گیا ہے۔ دریائے جہلم میں منگلا کے مقام پر پانی کی آمد 28 ہزار 100 کیوسک اور اخراج 7 ہزار کیوسک ہے۔ چشمہ بیراج میں پانی کی آمد 2 لاکھ 18 ہزار 100 کیوسک جبکہ اخراج ایک لاکھ 80 ہزار کیوسک ہے۔

(جاری ہے)

دریائے چناب میں ہیڈ مرالہ کے مقام پر پانی کی آمد 63 ہزار 800 کیوسک اور اخراج 38 ہزار 300 کیوسک جبکہ نوشہرہ کے مقام پر دریائے کابل میں پانی کی آمد و اخراج 37 ہزار 600 کیوسک ریکارڈ کیا گیا ہے۔

آبی ذخائر کی تفصیل کے مطابق تربیلا ریزروائر میں پانی کی سطح 1549.20 فٹ ہے جبکہ ذخیرہ شدہ پانی کی مقدار 56 لاکھ 82 ہزار ایکڑ فٹ ہے۔ منگلا ریزروائر میں پانی کی سطح 1218.70 فٹ ہے اور پانی کا ذخیرہ 55 لاکھ 11 ہزار ایکڑ فٹ ہے۔ چشمہ ریزروائر میں پانی کی سطح 647.70 فٹ اور ذخیرہ 2 لاکھ 44 ہزار ایکڑ فٹ ہے۔ترجمان کے مطابق تربیلا، منگلا، چشمہ، اور نوشہرہ میں پانی کی آمد و اخراج کا ڈیٹا گزشتہ 24 گھنٹوں کے اوسط بہاؤ کی بنیاد پر جاری کیا گیا ہے، جبکہ ہیڈ مرالہ سمیت دیگر مقامات کا ڈیٹا صبح 6 بجے کی صورتحال کے مطابق ہے۔واپڈا کے مطابق ملک کے اہم آبی ذخائر میں پانی کی وافر مقدار موجود ہے، جو نہ صرف زرعی ضروریات بلکہ آئندہ ممکنہ سیلابی صورتحال سے نمٹنے کے لیے بھی اہم ہے۔