حکومتی معاونت کے باوجود پاکستان ہاکی فیڈریشن مالی مشکلات سے دوچار

کھلاڑیوں کے ڈیلی الاؤنس ادا نہ کرنے والی فیڈریشن کے لیے فنڈز اکٹھا کرنا دشوار ہے،ذرائع

جمعرات 28 اگست 2025 23:47

لاہور(اُردو پوائنٹ اخبارتازہ ترین - این این آئی۔ 28 اگست2025ء)پرو ہاکی لیگ کیلئے 25 کروڑ روپے کی حکومتی معاونت کے باوجود پاکستان ہاکی فیڈریشن مالی مشکلات سے دوچار ہے۔ذرائع کے مطابق کھلاڑیوں کے ڈیلی الاؤنس ادا نہ کرنے والی فیڈریشن کے لیے فنڈز اکٹھا کرنا دشوار ہے، پرو لیگ کے صرف ایک ایڈیشن کے لیے فیڈریشن کو مزید 10 کروڑ درکار ہیں۔

(جاری ہے)

پاکستان ہاکی ٹیم نے آئندہ برس ورلڈ کپ کوالیفائیر اور ایشین چیمپئنز ٹرافی میں شرکت کرنا ہے، ایشین گیمز کے علاوہ کوالیفائی کرنے کی صورت میں ورلڈ کپ میں بھی ٹیم نے شرکت کرنا ہے۔

ذرائع کے مطابق اولمپک کوالیفائیرز میں شرکت بھی شیڈول میں شامل ہے، قومی ٹیم کے انوی ٹیشنل، جونیئر اور ایج گروپ ٹیموں کے ایونٹس اس کے علاوہ ہیں۔پاکستان ہاکی فیڈریشن کو ان ایونٹس کے لیے 30 سے 35 کروڑ روپے ایک سال میں درکار ہیں، پی ایچ ایف کو ایک سال کے لیے مجموعی طور پر کم از کم 45 کروڑ روپے اکٹھے کرنا ہیں۔ذرائع نے بتایا کہ پاکستان ہاکی فیڈریشن اپنی اہلیت ثابت نہ کر سکی تو اسے پھر حکومت کی جانب دیکھنا ہو گا، کثیر رقم درکار ہونے کی وجہ سے پاکستان ہاکی فیڈریشن مشکلات میں پھنس گئی ہے۔