متحدہ عرب امارات کے نجی شعبے میں اماراتی خواتین کی نمائندگی 70فیصد تک پہنچ گئی

جمعہ 29 اگست 2025 15:50

ابوظہبی(اُردو پوائنٹ اخبارتازہ ترین - این این آئی۔ 29 اگست2025ء)متحدہ عرب امارات کے نجی شعبے میں اماراتی خواتین کی نمائندگی 70فیصد تک پہنچ گئی ہے۔عرب میڈیاکے مطابق وزارت انسانی وسائل و اماراتائیزیشن میں لیبر مارکیٹ کی ترقی، تنظیم کی نگراں اور بین الاقوامی تعلقات و ابلاغ کی معاون سیکرٹری شیما العوضی نے بتایا کہ نجی شعبے میں کام کرنے والے اماراتی شہریوں کی تعداد ایک لاکھ 52ہزار ہے جن میں سے ایک لاکھ 7ہزار خواتین ہیں۔

شیما العوضی اماراتی خواتین کے حوالے سے منعقدہ فورم کے سیشن سے خطاب کر رہی تھیں جس کا موضوع خواتین: نجی شعبے میں محرک اور اماراتائیزیشن کا فروغ تھا۔شیما العوضی نے کہا کہ رواں سال لیبر مارکیٹ میں خواتین ورکرز کی تعداد میں 12فیصد اضافہ ریکارڈ کیا گیا جو گزشتہ سال کے مقابلے میں 2 فیصد زیادہ ہے۔

(جاری ہے)

انہوں نے کہا کہ یہ اعداد و شمار اس بات کا ثبوت ہیں کہ اماراتی خواتین ملکی معیشت میں موثر اور مستحکم کردار ادا کررہی ہیں، تعلیمی شعبے میں کام کرنے والے اماراتی شہریوں میں سے 98فیصد خواتین ہیں جبکہ نجی شعبے میں ٹیکنالوجی سے متعلق شعبوں میں خواتین کی شمولیت 61 فیصد ہے۔

طبی شعبے میں بھی خواتین کی بڑی تعداد موجود ہے۔شیما العوضی نے کہا کہ خواتین کی موجودگی نہ صرف نجی کمپنیوں بلکہ شاپنگ مالز اور تمام شعبہ ہائے زندگی میں نظر آتی ہے۔حکومت نے خواتین کو بااختیار بنانے کے لیے کئی پالیسیاں نافذ کی ہیں۔نیا لیبر لا خواتین کو مختلف اقسام کی چھٹیوں، سہولیات اور رہنمائی فراہم کرتا ہے جبکہ بے روزگاری انشورنس سکیم نے ان کے حقوق کی حفاظت کی ہے۔ سیونگز سکیم نے خواتین کے لیے سرمایہ کاری کے بہترین مواقع فراہم کیے ہیں۔