Live Updates

سیلاب سے متاثرہ ایک ایک گھر کا ازالہ کریں گے، پارک ویو سٹی انتظامیہ کا اعلان

اس مشکل وقت میں اپنے تمام رہائشیوں کے ساتھ کھڑے ہیں، کسی کو تنہا نہیں چھوڑیں گے، انتظامیہ کا بیان

فیضان ہاشمی جمعہ 29 اگست 2025 16:43

سیلاب سے متاثرہ ایک ایک گھر کا ازالہ کریں گے، پارک ویو سٹی انتظامیہ ..

لاہور( اُردو پوائنٹ اخبارتازہ ترین۔ 29 اگست 2025ء ) پنجاب میں آنیوالے تباہ کن سیلاب نے لاہور و گردونواح میں رہائشی آبادیوں کو بھی شدید متاثر کیا ہے۔ کئی گھروں کو نقصان پہنچا اور شہری مشکلات سے دوچار ہیں۔ اس مشکل گھڑی میں پارک ویو سٹی کی انتظامیہ نے اعلان کیا ہے کہ وہ اپنے تمام رہائشیوں کے ساتھ کھڑی ہے اور کسی کو تنہا نہیں چھوڑے گی۔

اپنی فیس بک پوسٹ پر جاری ایک بیان میں انتظامیہ کا کہنا ہے کہ جس گھر کو بھی سیلاب کے باعث نقصان پہنچا ہے، اس کا مکمل ازالہ کیا جائے گا۔ متاثرہ خاندانوں کو ریلیف فراہم کرنے کے لیے ہنگامی اقدامات کیے جارہے ہیں اور بحالی کے عمل کو اولین ترجیح دی جائے گی۔ انتظامیہ نے رہائشیوں کو یقین دلایا ہے کہ ہر ممکن مدد فراہم کی جائے گی تاکہ وہ جلد از جلد اپنی معمول کی زندگی کی طرف لوٹ سکیں۔

(جاری ہے)

واضح رہے لاہور کے پوش رہائشی علاقے پارک ویو سوسائٹی کے کئی بلاک دریائے راوی کے سیلابی پانی کی زد میں آگئے جس کی وجہ سے لوگ مہنگے گھر چھوڑ کر جانے پر مجبور ہوچکے ہیں۔ تفصیلات کے مطابق پارک ویو سوسائٹی کے اوورسیز، پلاٹینیم اور ڈائمنڈ بلاک سیلابی پانی میں ڈوب چکے ہیں جہاں رہائشی اور کمرشل عمارتیں پانی سے بھر چکی ہیں یہاں رات گئے سوسائٹی کی دیواروں کو توڑتے ہوئے تیزی سے پانی اندر داخل ہوا جس میں دیکھتے ہی دیکھتے شدت آگئی اور مذکورہ بلاکس پانی پانی ہوگئے، اس صورتحال کے پیش نظر رہائشیوں سے کہا گیا کہ مذکورہ علاقوں کو خالی کردیں۔

اس حوالے سے مزید بتایا گیا ہے کہ انتظامیہ کی طرف سے بنائے جانے والے حفاظتی بند توڑ کر دریائے راوی کا سیلابی پانی پارک ویو سوسائٹی کے اوورسیز، پلاٹینیم اور ڈائمنڈ بلاکس میں داخل ہوا، جس کے باعث یہاں سے رہائشیوں کو محفوظ مقامات پر منتقل ہونے کے اطلاعات کیے گئے اور لوگ اپنے انتہائی مہنگے گھر چھوڑ کر جانے پر مجبور ہوئے۔