سابق آئی پی ایل چیئرمین راجیو شکلا بی سی سی آئی کے عبوری صدر بن گئے

جمعہ 29 اگست 2025 23:33

نئی دہلی (اُردو پوائنٹ اخبارتازہ ترین - این این آئی۔ 29 اگست2025ء)بھارتی کرکٹ بورڈ (بی سی سی آئی) کے نائب صدر راجیو شکلا کو بھارتی بورڈ کا قائم مقام صدر بنادیاگیا۔این ڈی ٹی وی کی رپورٹ کے مطابق راجر بنی اب بورڈ آف کنٹرول فار کرکٹ ان انڈیا (بی سی سی آئی) کے صدر نہیں ہیں جس کے بعد اب نائب صدر راجیو شکلا فی الحال اگلے انتخابات تک عبوری صدر کے عہدے پر فائز ہیں۔

(جاری ہے)

راجیو شکلا ستمبر میں ہونے والے بی سی سی آئی کے اگلے انتخابات تک انچارج رہیں گے۔ 2015 میں راجیو شکلا کو بی سی سی آئی نے متفقہ طور پر دوبارہ آئی پی ایل کا چیئرمین مقرر کیا تھا جب کہ 18 دسمبر 2020 کو وہ بی سی سی آئی کے بلامقابلہ نائب صدر منتخب ہوئے تھے۔بھارتی رپورٹ کے مطابق راجر بنی اگلے ماہ دوبارہ منتخب ہونے کی صورت میں بی سی سی آئی کے صدر کے عہدے پر برقرار رہ سکتے ہیں، اگر وہ منتخب نہیں ہوئے تو ستمبر کے بعد بی سی سی آئی کو نیا صدر مل جائے گا۔