چیئرمین جوائنٹ چیفس آف اسٹاف کمیٹی جنرل ساحر شمشاد مرزا کا پاکستان اور ترکیہ کے دیرینہ، آزمودہ اور برادرانہ اسٹریٹجک تعلقات کو مزید وسعت دینے کے مشترکہ عزم کا اعادہ

جمعہ 29 اگست 2025 22:50

راولپنڈی (اُردو پوائنٹ اخبارتازہ ترین - اے پی پی۔ 29 اگست2025ء) چیئرمین جوائنٹ چیفس آف اسٹاف کمیٹی (سی جے سی ایس سی)جنرل ساحر شمشاد مرزا، نشانِ امتیاز (ملٹری)نےپاکستان اور ترکیہ کے دیرینہ، آزمودہ اور برادرانہ اسٹریٹجک تعلقات کو اجاگر کرتے ہوئے دونوں ممالک کے درمیان ان منفردتعلقات کو تمام شعبوں میں مزید وسعت دینےاور گہرا کرنے کےدونوں ممالک کےمشترکہ عزم کا اعادہ کیاہے۔

جمعہ کو آئی ایس پی آر سے جاری کردہ بیان کے مطابق چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے بطور مہمانِ خصوصی اسلام آباد میں منعقدہ ترک مسلح افواج کے یومِ فتح کی تقریب میں شرکت کی۔تقریب میں ممتاز سول و عسکری حکام، میڈیا نمائندگان، کاروباری رہنمائوں، سفارتی برادری کے اراکین اور سول سوسائٹی کے افراد نے بھی شرکت کی، جو پاکستان اور ترکیہ کے برادرانہ تعلقات کے لیے وسیع تر حمایت کی عکاسی کرتا ہے۔

(جاری ہے)

چیئرمین جوائنٹ چیفس آف اسٹاف کمیٹی نے یومِ فتح کے موقع پر ترکیہ کے عوام، سیاسی قیادت اور ترک مسلح افواج کے تمام رینکس کو دلی مبارکباد پیش کی۔ اپنے خطاب میں انہوں نے پاکستان اور ترکیہ کے دیرینہ، آزمودہ اور برادرانہ اسٹریٹجک تعلقات کو اجاگر کیا اور دونوں ممالک کے درمیان ان منفرد تعلقات کو تمام شعبوں میں مزید وسعت دینےاور گہراکرنےکے مشترکہ عزم کا اعادہ کیا جو مشترکہ اقدار، باہمی اعتماد اور مضبوط شراکت داری کی عکاسی کرتا ہے۔قبل ازیں،سی جے سی ایس سی کی آمد پران کا استقبال ترکیہ کے سفارتخانے کے ناظم الاموربیرک ایچے نے کیا۔