اسرائیلی محاصرے کے دوران مزید فلسطینی جاں بحق ہورہے ہیں، اقوامِ متحدہ

ہفتہ 30 اگست 2025 15:13

نیویارک(اُردو پوائنٹ اخبارتازہ ترین - این این آئی۔ 30 اگست2025ء)اقوامِ متحدہ کی امدادی ایجنسیوں نے غزہ شہر میں اسرائیلی فوجی حملوں میں شدت کے تناظر میں ایک بار پھر قحط کے پھیلا اور روکے جا سکنے والی بیماریوں کے بڑھتے خطرے پر ہنگامی وارننگ جاری کی ہے،جو جنگ سے تباہ حال علاقے میں انتہائی خراب حالاتِ زندگی سے جڑے ہیں۔ یو این او سی ایچ اے کے ترجمان جینز لائرکے نے اپنی ایک رپورٹ میں کہا ہے کہ ہم بڑے پیمانے پر قحط کی طرف تیزی سے بڑھ رہے ہیں،اور اس کے لیے غزہ کی پٹی میں بڑی مقدار میں خوراک پہنچانا اور اسے محفوظ طریقے سے تقسیم کرنا ضروری ہے۔

یو این کی حمایت یافتہ فوڈ سکیورٹی ماہرین کے آئی پی سی گروپ کی تازہ ترین تشویشناک رپورٹ کا حوالہ دیتے ہوئے لائرکے نے بتایا کہ اس وقت 5 لاکھ افراد سب سے بدترین صورت حال سے دوچار ہیں جبکہ آنے والے ہفتوں میں مزید ایک لاکھ 60 ہزار افراد اس میں شامل ہو سکتے ہیں۔

(جاری ہے)

انہوں نے صحافیوں کو بتایا کہ ان سب کو خوراک کی فوری ضرورت ہے۔ پوری غزہ کی پٹی کو خوراک کی ضرورت ہے۔ اگر خوراک کی کافی مقدار دستیاب ہوتی تو قحط کا اعلان ہی نہ کیا جاتا۔غزہ کی وزارتِ صحت کے مطابق گزشتہ 24 گھنٹوں میں قحط اور غذائی قلت کے باعث مزید 5 اموات ہوئیں، جن میں 2 بچے بھی شامل ہیں، جس کے بعد بھوک سے ہونے والی اموات کی مجموعی تعداد 322 ہو گئی ہے، جن میں 121 بچے شامل ہیں۔