Live Updates

این ڈی ایم اے نے گلگت بلتستان اور آزاد کشمیر میں لینڈ سلائیڈنگ کا الرٹ جاری کردیا

جمعرات 4 ستمبر 2025 20:40

اسلام آباد (اُردو پوائنٹ اخبارتازہ ترین - اے پی پی۔ 04 ستمبر2025ء) نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشن سینیٹر نے گلگت بلتستان اور آزاد کشمیر کے حساس علاقوں میں لینڈ سلائیڈنگ کے خطرے کا الرٹ جاری کردیا۔ موسم کی خرابی اور ممکنہ بارشوں کے پیش نظر ان علاقوں میں لینڈ سلائیڈنگ کا خدشہ بڑھ گیا ہے۔ خاص طور پر کشمیر کے اضلاع مظفرآباد، نیلم ویلی، حویلی، باغ، پونچھ اور سدھنوتی میں شدید بارشوں کا امکان ظاہر کیا گیا ہے جس سے صورتحال مزید سنگین ہو سکتی ہے۔

ترجمان این ڈی ایم اے کے مطابق بارشوں اور ممکنہ سیلابی صورتحال کے باعث شاہراہ قراقرم کے مختلف مقامات پر لینڈ سلائیڈز کا خطرہ نمایاں طور پر بڑھ گیا ہے۔ این ڈی ایم اے کے مطابق، تورغر روڈ 120، بٹگرام روڈ 140، شانگلہ روڈ 160، لوئر کوہستان روڈ 180، اور تتہ پانی روڈ 320 سے 360 تک متاثر ہو سکتے ہیں۔

(جاری ہے)

اس کے علاوہ گلگت روڈ 400 سے 420، ہنزہ، روندو، اسکردو اور چترال کے مقامات پر بھی لینڈ سلائیڈنگ کا خدشہ موجود ہے۔

این ڈی ایم اے نے عوام سے اپیل کی ہے کہ پہاڑی علاقوں میں لینڈ سلائیڈز کے خطرے کے پیش نظر غیر ضروری سفر سے گریز کیا جائے۔ موسم اور سڑکوں کی تازہ صورتحال سے باخبر رہنے کے لئے ریڈیو، ٹی وی اور پاک این ڈی ایم اے ڈیزاسٹر الرٹ ایپ سے رہنمائی حاصل کرنے کی ہدایت کی گئی ہے۔ نیشنل ایمرجنسیز آپریشن سینٹر 24 گھنٹے فعال رہے گا اور سول و عسکری اداروں کے ساتھ مسلسل رابطے میں ہے۔عوام سے درخواست کی گئی ہے کہ مقامی انتظامیہ کی ہدایات پر فوری عمل کیا جائے اور کسی بھی ہنگامی صورتحال میں امدادی ٹیموں سے رابطہ کیا جائے۔ این ڈی ایم اے نے تمام متعلقہ اداروں کو ہائی الرٹ رہنے کی ہدایت کر دی ہے تاکہ کسی بھی ممکنہ نقصان سے بچا جا سکے۔