Live Updates

کشمیر سے آنیوالے سیلابی ریلے کی گجرات میں تباہی ، ریلیف آپریشن کی نگرانی کر رہا ہوں،چوہدری شافع حسین

جمعرات 4 ستمبر 2025 22:10

لاہور (اُردو پوائنٹ اخبارتازہ ترین - اے پی پی۔ 04 ستمبر2025ء) صوبائی وزیر صنعت و تجارت چوہدری شافع حسین نے کہا ہے کہ کشمیر سے آنے والے سیلابی ریلا نے گجرات شہر کی تباہی کی ۔گزشتہ دو روز سے مسلسل جاگ رہا ہوں اور تمام ریلیف کے کاموں کی خود نگرانی کر رہا ہوں۔صوبائی وزیر صنعت نے گجرات میں سیلابی صورتحال پر میڈیا سے گفتگو کرتے ہوئے کہا کہ سیلاب کے باعث گائوں لوراں اور مدینہ سیداں کا حفاظتی بند ٹوٹ گیا ہے۔

بند لگانے کیلئے رات بھر سے کام جاری ہے اور میری کوشش ہے کہ ناگہانی آفت سے شہریوں کا کم سے کم نقصان ہو ۔

(جاری ہے)

انہوں نے کہا کہ گجرات شہر سے پانی نکالنے کیلئے ایک عارضی نالہ بنایا جارہا ہے جو شہر کے پانی کو دریائے چناب میں پھینکے گا ۔ صوبائی وزیر نے کہا کہ بارشوں سے نمبٹنے کیلئے تمام انتظامات مکمل تھے۔ امید ہے کہ آج ہر صورت میں بند کو تعمیر کر دیا جائے گا ۔ صوبائی وزیر نے کہاکہ گجرات کی تاریخ میں پہلی مرتبہ طوفانی بارشوں سے اتنا زیادہ سیلاب آیا ہے۔ہماری پوری کوشش ہے کہ اپنی عوام کو ناگہانی آفت سے بچائیں ۔ انہوں نے کہا کہ موسمیاتی تبدیلیوں کے باعث بارشوں میں اضافہ ہوگا اب ہمیں چھوٹے ڈیم بنانا ہونگے جو تین سال کی مدت میں بن جاتے ہیں ۔