وزیر کھیل و امور نوجوانان سید فخر جہان کا جشنِ عید میلادالنبیؐ کی تقریب سے خطاب

جمعہ 5 ستمبر 2025 18:20

پشاور (اُردو پوائنٹ اخبارتازہ ترین - اے پی پی۔ 05 ستمبر2025ء) خیبرپختونخوا کے وزیر کھیل و امور نوجوانان سید فخر جہان نے ڈائریکٹوریٹ جنرل آف سپورٹس خیبرپختونخوا کے زیر اہتمام منعقدہ جشنِ عید میلادالنبیؐ کی روح پرور تقریب میں بطور مہمانِ خصوصی شرکت کی۔محکمہ کھیل و امور نوجوانان خیبرپختونخوا تر جمان کے مطابق اس موقع پر سیکرٹری محکمہ کھیل و امور نوجوانان سعادت حسن، ڈائریکٹر جنرل سپورٹس تاشفین حیدر سمیت محکمہ کے دیگر افسران و عملے کی بڑی تعداد موجود تھی۔

تقریب سے خطاب کرتے ہوئے صوبائی وزیر نے کہا کہ سرورِ دو عالم، خاتم النبین، حضرت محمد مصطفیٰؐ کی ولادتِ باسعادت کائناتِ انسانی کے لیے سب سے بڑی رحمت اور رشد و ہدایت کا سرچشمہ ہے۔ آپؐ کی ذات اقدس، اخلاق، رواداری، عدل، مساوات، بھائی چارے اور انسان دوستی کا عملی نمونہ ہے جس کی پیروی دنیا و آخرت کی فلاح کا ذریعہ ہے۔

(جاری ہے)

سید فخر جہان نے کہا کہ حضور نبی کریمؐ کا اسوہ حسنہ ہر دور کے انسان کے لیے مکمل رہنما ہے۔

آپؐ کی سیرتِ طیبہ دلوں کو نور بخشتی ہے، روح کو سکون دیتی ہے اور انسان کو ایک باعمل، بااخلاق اور باکردار شخصیت میں ڈھالتی ہے۔ اگر ہم انفرادی و اجتماعی سطح پر تعلیماتِ نبویؐ کو اپنا لیں تو ہمارے معاشرتی مسائل خود بخود ختم ہو سکتے ہیں۔صوبائی وزیر نے مزید کہا کہ ہمیں چاہیے کہ ہم سیرت النبیؐ کو محض زبانی نہ پڑھیں بلکہ اسے اپنے کردار، گفتار، معاملات اور نظامِ زندگی کا حصہ بنائیں۔

نبی کریمؐ کی تعلیمات ہمارے لیے مینارِ نور ہیں، جن سے ہم دنیا و آخرت کی کامیابیاں حاصل کر سکتے ہیں۔ دین اسلام ایک مکمل ضابطہ حیات ہے اور سنتِ رسولؐ اس ضابطے کی عملی تفسیر ہے۔انہوں نے کہا کہ نوجوان ہمارا مستقبل ہیں اور اگر ہم نوجوان نسل کو سیرت النبیؐ سے روشناس کرائیں، تو ایک پرامن، باشعور اور باکردار معاشرہ تشکیل دیا جا سکتا ہے۔آخر میں انہوں نے دعا کی کہ اللہ تعالیٰ ہمیں اپنے محبوبؐ کی سیرت کو سمجھنے، اس پر عمل کرنے اور اسے معاشرے میں عام کرنے کی توفیق عطا فرمائے۔