فیفا ورلڈ کپ 2026 کیلیے کوالیفائی کرنے والی مزید 3 ٹیمیں سامنے آگئیں

رپورٹ کے مطابق یوروگوئے، کولمبیا اور پیراگوئے نے فیفا ورلڈ کپ 2026 کیلیے کوالیفائی کر لیا ہے

اتوار 7 ستمبر 2025 12:50

چی(اُردو پوائنٹ اخبارتازہ ترین - این این آئی۔ 07 ستمبر2025ء) فیفا ورلڈ کپ 2026 کیلیے کوالیفائی کرنے والی تین ٹیموں کے نام سامنے آگئے۔رپورٹ کے مطابق یوروگوئے، کولمبیا اور پیراگوئے نے فیفا ورلڈ کپ 2026 کیلیے کوالیفائی کر لیا ہے۔ یوروگوئے نے گزشتہ روز ہوم گراؤنڈ پر پیرو کو 0-3 سے شکست دے کر اپنی جگہ یقینی بنائی جبکہ کولمبیا نے بولیویا کو اسی اسکور لائن سے ہرایا۔

پیراگوئے نے ایکواڈور کے ساتھ 0-0 سے ڈرا کھیل کر ٹورنامنٹ کیلیے کوالیفائی کر لیا۔مونٹی ویڈیو کے اسٹاڈیو سینٹیناریو میں 60 ہزار تماشائیوں کی موجودگی میں روڈریگو آگوری نے 14ویں منٹ میں شاندار ہیڈر سے یوروگوئے کو برتری دلائی۔یوروگوئے کی جانب سے جیورجیان ڈی آراسکیٹا نے دوسرا گول 59ویں منٹ میں کیا جبکہ فیڈریکو ویناس نے میچ ختم ہونے سے 10 منٹ قبل تیسرا گول کر دیا۔

(جاری ہے)

ادھر کولمبیا نے بولیویا کے خلاف باآسانی کامیابی حاصل کی۔ سابق ریال میڈرڈ اور بایرن میونخ کے کھلاڑی جیمز روڈریگز نے 34ویں منٹ میں پہلا گول کیا۔اس کے بعد جھون کورڈوبا نے 74ویں منٹ میں دوسرا جبکہ جوان فرنینڈو کوئنٹیرو نے تیسرا گول اسکور کر کے ٹیم کو اگلے مرحلے میں پہنچا دیا۔پیراگوائے کو ایکواڈور کے خلاف صرف ڈرا درکار تھا جو انہوں نے بغیر گول کے مقابلے کے ساتھ حاصل کر لیا اور یوں اپنی نویں ورلڈ کپ شرکت یقینی بنائی۔یاد رہے کہ برازیل اور دفاعی چیمپئن ارجنٹائن پہلے ہی 2026 کے ورلڈ کپ کیلیے کوالیفائی کر چکے ہیں۔