Live Updates

فرنچائز کراچی کنگز کا اداکارہ پریتی زنٹا کی فرنچائز کنگز الیون پنجاب کی متنازع پوسٹ پر کرارا جواب

ہفتہ 13 ستمبر 2025 17:02

کراچی (اُردو پوائنٹ اخبارتازہ ترین - این این آئی۔ 13 ستمبر2025ء)پاکستان سپر لیگ (پی ایس ایل) کی فرنچائز کراچی کنگز نے اداکارہ پریتی زنٹا کی فرنچائز کنگز الیون پنجاب کی متنازع پوسٹ پر کرارا جواب دے دیا۔انڈین پریمیئر لیگ (آئی پی ایل) میں پریتی زنٹا کی فرنچائز پنجاب الیون نے سوشل میڈیا پر ایک پوسٹ میں اسپورٹس مین اسپرٹ کے منافی اقدام کرتے ہوئے بھارت کے خلاف میچ کے شیڈول والے پوسٹر سے پاکستان کا لوگو ہی ہٹا دیا تھا۔

آئی پی ایل ٹیم پنجاب کنگز کھیل میں سیاست لے آئی، ٹیم نے اپنی سوشل میڈیا پوسٹ میں پوسٹر سے پاکستان کرکٹ بورڈ (پی سی بی) کا لوگو ہٹا دیا تھا، جس پر صارفین کی جانب سے اسے شدید تنقید کا سامنا کرنا پڑ گیا۔پنجاب کنگز نے اپنی سوشل میڈیا پوسٹ میں پاکستان کے لوگو کی جگہ ایک سفید ڈبہ لگایا جبکہ پوسٹ میں بھارتی کرکٹ بورڈ کا لوگو واضح طور پر نظر آرہا ہے۔

(جاری ہے)

پنجاب ٹیم کی سوشل میڈیا پوسٹ پر دنیا بھر کے کرکٹ فینز کی جانب سے تنقید کی جا رہی ہے اور بھارتیوں نے بھی اس حرکت پر پنجاب کنگز کو آڑے ہاتھوں لے لیا۔سخت تنقید کے بعد آئی پی ایل کی ٹیم پنجاب کنگز نے کمنٹس کا سیکشن بند کر دیا۔ فینز نے پنجاب کنگز کی اس اوچھی حرکت کو احمقانہ اور بچکانہ عمل قرار دے دیا۔اب پی ایس ایل کی فرنچائز کراچی کنگز کی جانب سے بھی ایک تخلیقی پوسٹ شیئر کرتے ہوئے پنجاب کنگز کو بھرپور جواب دیا گیا ہے۔

کراچی کنگز کی سوشل میڈیا پوسٹ میں پاکستان کے کپتان سلمان علی آغا کو شطرنج کھیلتے دکھایا گیا جبکہ بھارتی کپتان کی تصویر مکمل طور پر سائے میں لپٹی ہوئی تھی۔اسی تصویر میں ٹیبل پر رکھی گھڑی بھی نظر آرہی ہے جس میں پورے چھ بجتے ہوئے نظر آرہا ہے جو غالباًً اس بات کی طرف اشارہ ہے کہ آپریشن بنیان المرصوص میں پاکستان نے بھارت کے 6 لڑاکا طیارے مار گرائے تھے۔