زرمبادلہ کے ملکی ذخائر میں کیلنڈر سال کے دوران اب تک 3.73 ارب ڈالر کا اضافہ

پیر 8 ستمبر 2025 12:10

اسلام آباد (اُردو پوائنٹ اخبارتازہ ترین - اے پی پی۔ 08 ستمبر2025ء) زرمبادلہ کے ملکی ذخائر میں کیلنڈر سال کے آغاز سے لے کر اب تک 3.73 ارب ڈالر کا اضافہ ریکارڈ کیا گیا ہے۔ سٹیٹ بینک کی جانب سے جاری کردہ اعدادوشمار کے مطابق گزشتہ کیلنڈر سال کے اختتام پر زرمبادلہ کے ملکی ذخائر کا حجم 15.92 ارب ڈالر ریکارڈ کیا گیا تھا ، جس میں سٹیٹ بینک کے پاس زرمبادلہ کے ذخائر کا حجم 11.73 ارب ڈالر اور کمرشل بینکوں کے پاس زرمبادلہ کے ذخائر کا حجم 4.195 ارب ڈالر ریکارڈ کیا گیا تھا۔

(جاری ہے)

29 اگست کو ختم ہونے والے ہفتے میں زرمبادلہ کے ملکی ذخائر کا حجم 19.660 ارب ڈالر ریکارڈ کیا گیا جس میں سٹیٹ بینک کے پاس زرمبادلہ کے ذخائر کا حجم 14.30 ارب ڈالر اور بینکوں کے پاس زرمبادلہ کے ذخائر کا حجم 5.35 ارب ڈالر ریکارڈ کیا گیا جو دو ماہ کی درآمدات کےلئے کافی ہے۔ جاری کیلنڈر سال کے آغاز سے لے کر اب تک سٹیٹ بینک کے پاس موجود زرمبادلہ کے ذخائر میں 2.571 ارب ڈالر اور کمرشل بینکوں کے پاس زرمبادلہ کے ذخائر کے حجم میں 1.161 ارب ڈالر کا اضافہ ریکارڈ کیا گیا ہے۔