Live Updates

لاہور ہائیکورٹ نے سینیٹ الیکشن کی پولنگ روکنے کی استدعا مسترد کر دی

جسٹس احمد ندیم ارشد نے اعجاز چوہدری کی درخواست پرمحفوظ فیصلہ سنایا

پیر 8 ستمبر 2025 20:25

لاہور(اُردو پوائنٹ اخبارتازہ ترین - این این آئی۔ 08 ستمبر2025ء)لاہور ہائیکورٹ نے سینیٹ الیکشن کی پولنگ روکنے کی استدعا مستر د کر دی ۔لاہور ہائیکورٹ کے جسٹس احمد ندیم ارشد نے پی ٹی آئی کے رہنما اعجاز چوہدری کی درخواست پر محفوظ فیصلہ سنایا۔اعجاز چوہدری نے سینیٹ کے انتخاب روکنے کے لیے بیرسٹر تیمور ملک اور رانا مدثر عمر کی وساطت سے درخواست دائر کی تھی ۔

(جاری ہے)

درخواست میں موقف اختیار کیا گیا تھا کہ الیکشن کمیشن نے اعجاز چوہدری کو 28 جولائی کو ڈی نوٹیفائی کر دیا، چیئرمین سینیٹ کی جانب سے دی نوٹیفائی کرنے کے لیے درخواست ارسال نہیں کی گئی۔موقف اختیار کیا گیا کہ پشاور ہائیکورٹ شبلی فراز اور عمر ایوب کی درخواست پر الیکشن روکنے کا حکم دے چکی ہے، الیکشن کمیشن نے سیلابی صورتحال کے باعث ملک بھر میں ضمنی انتخابات روک دیئے ہیں۔درخواست میں موقف اختیار کیا گیا کہ سیلابی صورتحال میں سینیٹ انتخابات کی بولنگ نہیں روکی جا رہی، درخواست میں استدعا کی گئی کہ عدالت اعجاز چوہدری کی سینیٹ نشست پر انتخاب روکنے کا حکم دے۔عدالت نے دلائل سننے کے بعد فیصلہ محفوظ کر لیا تھا جو بعد ازاں سناتے ہوئے استدعا مسترد کر دی گئی ۔