سویا ہوا تھا بانی نے مجھے سپیکر نامزد کر دیا، بابر سلیم سواتی کا انکشاف

بدھ 10 ستمبر 2025 20:10

پشاور (اُردو پوائنٹ اخبارتازہ ترین - این این آئی۔ 10 ستمبر2025ء)اسپیکر خیبر پختونخوا اسمبلی بابر سلیم سواتی نے انکشاف کیا ہے کہ میں سویا ہوا تھا کہ بانی پی ٹی آئی نے مجھے اسپیکر نامزد کردیا۔اسمبلی ہال میں منعقدہ تقریب سے خطاب میں بابر سلیم سواتی نے کہا کہ دانستہ طور پر کسی قسم کی کوتاہی نہیں کی، آج پارلیمانی تاریخ کا اہم دن ہے،بانی پی ٹی آئی قانون کی بالادستی کی بات کر رہے ہیں۔

اسپیکر خیبر پختونخوا اسمبلی نے کہا کہ 1974ء میں گورنر کے نوٹیفکیشن کے تحت رولز بنے تھے، جواب تک چلتے رہے۔

(جاری ہے)

انہوںنے کہاکہ کہنے کو تو آپ آزاد ہیں، گورا بادشاہ چلا گیا مگر سسٹم وہی چلتا رہا، ہم آسٹریلیا اور دیگر پارلیمانی نظام کو دیکھ کر تبدیلی لائے۔بابر سلیم سواتی نے کہا کہ ہم نے ان قوانین کو لوگوں کے خواہشات کے مطابق بنایا، پہلے اسمبلی میں انگریزی، اردو اور پشتو میں اظہارخیال کیا جاسکتا تھا، اب ہندکو اور سرائیکی میں بھی ایوان میں بات ہوسکے گی۔انہوں نے کہا کہ وزیراعلیٰ کے ساتھ کبھی کبھی تلخی بھی ہوتی رہی لیکن اصلاحات میں انہوں نے سپورٹ کیا، یہاں کے موسم کا کچھ پتا نہیں چلتا کہ کب کلائوڈ برسٹ ہوجائے۔