آزاد جموں و کشمیر اسٹیئرنگ کمیٹی برائے اقوامِ متحدہ پائیدار ترقیاتی فریم ورک کا پہلا اجلاس

جمعرات 11 ستمبر 2025 23:01

مظفر آباد (اُردو پوائنٹ اخبارتازہ ترین - این این آئی۔ 11 ستمبر2025ء)محکمہ منصوبہ بندی و ترقیات حکومتِ آزاد جموں و کشمیر میں اقوامِ متحدہ پائیدار ترقیاتی فریم ورک (UNSDCF 2023-2027) کی اسٹیئرنگ کمیٹی کا پہلا اعلیٰ سطحی اجلاس منعقد ہوا۔اجلاس کی صدارت ایڈیشنل چیف سیکرٹری ترقیات عاطف الرحمن نے کی۔ اجلاس میں اقوامِ متحدہ کے ریزیڈنٹ کوآرڈینیٹر (UNRC)محمد یحییٰ نے خصوصی شرکت کی۔

اجلاس میں اقوامِ متحدہ کی ایجنسیوں کی آزاد جموں و کشمیر میں جاری شراکتی سرگرمیوں اور تعاون کا جائزہ لیا گیا۔ اس موقع پر اقوامِ متحدہ کے ریزیڈنٹ کوآرڈینیٹر نے آزاد جموں و کشمیر میں ترقیاتی اہداف کے حصول کے لیے جاری منصوبوں اور اقدامات پر اطمینان کا اظہار کرتے ہوئے اس عزم کا اعادہ کیا کہ اقوامِ متحدہ آئندہ بھی حکومتِ آزاد جموں و کشمیر کے ساتھ قریبی تعاون اور بھرپور معاونت جاری رکھے گا۔

(جاری ہے)

اسٹیئرنگ کمیٹی کے اجلاس میں مختلف محکموں کے نمائندگان اور اقوامِ متحدہ کی ایجنسیوں کے حکام نے شرکت کی اور پائیدار ترقی، سماجی و معاشی بہتری، تعلیم، صحت اور ماحولیات کے شعبوں میں مشترکہ حکمتِ عملی پر غور کیا گیا۔اجلاس میں اتفاق کیا گیا کہ حکومتِ آزاد جموں و کشمیر اور اقوامِ متحدہ کے ادارے مل کر UNSDCF (2023-2027) کے تحت ترقیاتی ترجیحات کو مزید مؤثر بنائیں گے تاکہ خطے کی عوام کو زیادہ سے زیادہ فوائد پہنچائے جا سکیں۔