پی ٹی آئی کے پی کی کالا باغ ڈیم کی مخالفت، معدنیات سے متعلق یکطرفہ فیصلوں کو مسترد کردیا

جمعہ 12 ستمبر 2025 22:44

اسلام آباد (اُردو پوائنٹ اخبارتازہ ترین - این این آئی۔ 12 ستمبر2025ء)پاکستان تحریک انصاف خیبر پختونخوا نے کالا باغ ڈیم منصوبے کی مخالفت کردی اور معدنیات سے متعلق یکطرفہ فیصلوں کو مسترد کر دیا۔پی ٹی آئی خیبر پختونخوا کے صدر، جنرل سیکرٹری اور عہدے داران کا اجلاس جنید اکبر کی زیر صدارت ہوا۔اجلاس میں پاکستان تحریک انصاف نے کالا باغ ڈیم کے منصوبے کی مخالفت کی اور معدنیات سے متعلق یکطرفہ فیصلوں کو مسترد کر دیا۔

پارٹی اجلاس میں کالا باغ ڈیم کی مخالفت، معدنیات سے متعلق یکطرفہ فیصلوں کو مسترد کرنے اور قیادت کی رہائی کی قراردادیں منظور کی گئیں۔اجلاس میں منظور کی گئی قرار داد میں کہا گیا کہ کالا باغ ڈیم کو قطعی طور پر مسترد کیا جائے، کالا باغ ڈیم زرخیز زمینوں کو ڈبونے، لوگوں کوبے گھر کرنے اور صوبائی تنازعات پیدا کرنے کا سبب بنے گا۔

(جاری ہے)

اجلاس میں کہا گیا کہ بانی پی ٹی آئی کے معدنی وسائل سے متعلق مؤقف کو تسلیم کیا جائے، صوبے اور عوام کے وسائل کے معاہدے سے متعلق خیبرپختونخوا اسمبلی سے اجازت لی جائے، کمپنیوں سے معاہدے اور سابقہ فاٹا میں منصوبوں سے متعلق جانچ پڑتال کا اختیار کے پی اسمبلی کو دیا جائے۔

پی ٹی آئی نے صوبائی حکومت کے سامنے 4 نکاتی ایجنڈا بھی قرارداد کی صورت میں رکھ دیا جس میں کہا گیا کہ ضم شدہ اضلاع میں آپریشن اور ڈرون حملے بند کیے جائیں، سپریم کورٹ میں آرٹیکل 245 سے متعلق اپیل واپس لی جائے، ضم شدہ اضلاع اور خیبر پختونخوا میں سول اتھارٹی مکمل طور پر بحال کی جائے، خیبر پختونخوا میں 9 مئی سے جڑے تمام مقدمات کو ختم کیا جائے اور 8 فروری کو غیر قانونی اقدامات کرنے والے افسران کو جوابدہ کیا جائے۔پی ٹی آئی کے پی کے اجلاس میں یہ قرار داد بھی منظور کی گئی کہ بانی پی ٹی آئی کے وڑن کے مطابق بلین ٹری سونامی منصوبے کے تحت ماحولیاتی تبدیلی پر کام کیا جائے، وفاقی حکومت کے یکطرفہ معاہدے اور آپریشن کی صورت میں علی امین عوام کے ساتھ کھڑے ہو جائیں۔