وزیر لائیو سٹاک فضل حکیم یوسفزئی سے نو تعینات ڈائریکٹر جنرل فشریز محمد شفیع مروت کی ملاقات

ادارے کی کارکردگی کو مزید بہتر بنانے، عوامی مفاد کے اقدامات ،ادارے کی شفافیت پر گفتگو

جمعہ 12 ستمبر 2025 22:40

سوات (اُردو پوائنٹ اخبارتازہ ترین - این این آئی۔ 12 ستمبر2025ء)خیبرپختونخوا کے وزیر برائے لائیو سٹاک، فشریز و کوآپریٹیو فضل حکیم خان یوسفزئی سے ان کے دفتر میں نئے تعینات ہونے والے ڈائریکٹر جنرل فشریز محمد شفیع مروت نے ملاقات کی۔ اس موقع پر ڈائریکٹر فشریز (فاٹا)الیاس خٹک بھی موجود تھے۔ ملاقات میں محکمہ فشریز کی کارکردگی کو مزید بہتر بنانے، عوامی مفاد کے اقدامات اور ادارے کی شفافیت کے حوالے سے تفصیلی گفتگو کی گئی۔

صوبائی وزیر نے ڈائریکٹر جنرل فشریز کو ہدایات جاری کرتے ہوئے کہا کہ محکمہ فشریز کو مزید کرپشن سے پاک اور عوامی خدمت کا حقیقی ادارہ بنایا جائے۔ انہوں نے کہا کہ محکمے میں مثبت تبدیلی، شفاف نیلامیوں اور ترقیاتی اقدامات کے ذریعے نہ صرف کارکردگی کو بہتر بنایا جا سکتا ہے بلکہ عوامی اعتماد کی بحالی میں بھی مدد ملے گی۔

(جاری ہے)

فضل حکیم خان یوسفزئی نے اس موقع پر بتایا کہ محکمہ فشریز کی جانب سے ڈیموں میں مچھلیوں کی شفاف نیلامیوں کے نتیجے میں گزشتہ برس کے مقابلے میں نمایاں آمدنی حاصل ہوئی ہے۔

تاندہ ڈیم کوہاٹ میں مچھلیوں کی نیلامی پچھلی بار 80 لاکھ روپے میں ہوئی تھی، جو اس سال بڑھ کر 2 کروڑ 40 لاکھ روپے میں نیلام ہوئی۔ اسی طرح زمیر گل ڈیم کوہاٹ میں مچھلیوں کی نیلامی 25 لاکھ کے مقابلے میں اس سال ایک کروڑ 26 لاکھ روپے میں کی گئی۔ درملک ڈیم کوہاٹ میں مچھلیوں کی نیلامی پچھلی بار 15 لاکھ میں نیلام ہوا، جبکہ اس بار 36 لاکھ روپے میں نیلام ہوا۔ پشاور کے ازاخیل ڈیم میں مچھلیوں کی نیلامی پچھلی بار 14 لاکھ میں ہوئی تھی، جو اس سال 67 لاکھ روپے تک پہنچ گئی۔ انہوں نے کہا کہ اگر یہی تسلسل برقرار رہا تو آنے والے دنوں میں فشریز سیکٹر صوبے کی معیشت میں ایک مضبوط ستون بن کر ابھرے گا اور عوامی اعتماد کی بحالی میں بھی اہم کردار ادا کرے گا۔