کراچی‘ رات گئے فائرنگ اور پرتشدد واقعے میں 2 افراد جاں بحق

ڈرگ روڈ کے قریب گھر سے نوجوان کی گولی لگی لاش ملی جس کی شناخت ارتضیٰ علی کے نام سے ہوئی‘ پولیس

ہفتہ 13 ستمبر 2025 12:10

کراچی(اُردو پوائنٹ اخبارتازہ ترین - این این آئی۔ 13 ستمبر2025ء)کراچی میں رات گئے فائرنگ اور پرتشدد واقعے میں 2 افراد جاں بحق ہوگئے۔پولیس کے مطابق ڈرگ روڈ کے قریب گھر سے نوجوان کی گولی لگی لاش ملی جس کی شناخت ارتضیٰ علی کے نام سے ہوئی۔پولیس کا بتانا ہے کہ مقتول نے پسند کی شادی کی تھی، مقتول اپنے سسرال آیا ہوا تھا، ممکنہ طور پر قتل غیرت کے نام پر ہوا تاہم مزید تفتیش جاری ہے۔

(جاری ہے)

ادھر سپر ہائی وے جنجال گوٹھ میں نامعلوم افراد نے چھری کے وار سے 40 سال کے وحید اللہ کو قتل کردیا، مقتول کا تعلق اپر دیر سے تھا اور ابتدائی تفتیش میں واقعہ ذاتی دشمنی کا نتیجہ معلوم ہوتا ہے۔دوسری جانب جوہر موڑ کے قریب فائرنگ سے 19 سال کی لڑکی ایمن نامی زخمی ہوئی جب کہ شاہ فیصل کالونی میں ڈکیتی مزاحمت کے دوران ڈاکوؤں کی فائرنگ سے 25 سال کا شہروز نامی نوجوان زخمی ہوا۔

گلشن حدید میں بھی ڈکیتی مزاحمت پر 45 سالہ خالد نامی شخص ڈاکوؤں کی فائرنگ سے زخمی ہوا، پاک کالونی میں نامعلوم سمت سے گولی لگنے سے حسن الٰہی نامی شخص زخمی ہوا جب کہ رات گئے فیڈرل بی ایریا بلاک 15، ڈیفنس فیز ایٹ اور لیاری بغدادی میں3 مبینہ پولیس مقابلوں کے دوران پولیس نے 4 زخمیوں سمیت 5 ڈاکوؤں کو اسلحہ، موبائل فونز اور موٹر سائیکل سمیت گرفتار کیا۔