کراچی کی تاریخ کا سب سے بڑا ریپ اسکینڈل، پولیس کی تحقیقات میں لرزہ خیز انکشافات

ہفتہ 13 ستمبر 2025 23:17

کراچی(اُردو پوائنٹ اخبارتازہ ترین - این این آئی۔ 13 ستمبر2025ء) قیوم آباد کے علاقے میں بچوں اوربچیوں سے زیادتی کرنے والے ملزم کے خلاف تحقیقات میں ہولناک حقائق سامنے آئے ہیں۔پولیس کے مطابق ملزم گزشتہ 9 سال سے علاقے میں کمسن بچیوں اور بچوں کو نشانہ بناتا رہا اور اس دوران اس نے 286 بچیوں کی فہرست تیار کر رکھی تھی۔پولیس کا کہنا ہے کہ ملزم کی زیادتی کا شکار بننے والی کئی بچیاں اور ان کے خاندان علاقہ چھوڑ کر جا چکے ہیں۔

ملزم کے قبضے سے 350 سے زائد نازیبا تصاویر اور ویڈیوز بھی برآمد ہوئی ہیں، جن میں ایک ہی بچی کے ساتھ کئی بار کی گئی زیادتی کی ریکارڈنگ بھی شامل ہے۔تحقیقات میں سامنے آیا ہے کہ ملزم 2011 میں ایبٹ آباد سے کراچی آیا اور قیوم آباد میں مختلف دکانوں پر کام کرتا رہا۔

(جاری ہے)

2016 کے بعد اس نے ایک کریانہ اسٹور اور پھر شربت کا ٹھیلا بھی لگایا۔ مزید انکشاف ہوا ہے کہ اس نے علاقے میں ایک کوارٹر کرائے پر لے رکھا تھا جہاں وہ بچیوں کو لے جایا کرتا تھا۔

پولیس کے مطابق ملزم کی گرفتاری اس وقت ممکن ہوئی جب اس کے گھر سے ایک بچی کے ہاتھ لگی ہوئی یو ایس بی میں موجود شواہد سامنے آئے۔ برآمد شدہ موبائل فونز اور یو ایس بی میں موجود مواد کے حوالے سے تحقیقات جاری ہیں کہ وہ تصاویر اور ویڈیوز کس مقصد کے لیے محفوظ کی گئی تھیں۔پولیس نے مزید بتایا کہ ملزم کی فیس بک آئی ڈی بھی تفتیش کے دائرے میں ہے۔