Live Updates

سیلاب متاثرہ علاقوں میں بجلی کی بحالی کا کام تیزی سے جاری

پیر 15 ستمبر 2025 15:08

اسلام آباد (اُردو پوائنٹ اخبارتازہ ترین - اے پی پی۔ 15 ستمبر2025ء) سیلاب متاثرہ علاقوں میں بجلی کی بحالی کا کام تیزی سے جاری ہے، مجموعی طور پر 51 گرڈ اور 543 فیڈرز متاثر ہوئے جن میں سے 309 فیڈر کو مکمل اور 226 کو جزوی طور پر بحال کر دیا گیا ہے، باقی متاثرہ علاقوں میں بجلی کی مکمل بحالی اولین ترجیح ہے۔ سیلاب متاثرہ علاقوں میں بجلی بحالی پر پاور ڈویژن کی 15 ستمبر تک کی جاری رپورٹ کے مطابق فیسکو کے زیرِ انتظام علاقوں میں 28 گرڈ اور 81 فیڈرز متاثر ہوئے، متاثرہ فیڈرز میں 36 مکمل اور 44 کو جزوی طور پر بحال کر لیا گیا ہے، 61909 متاثرہ صارفین کیلئے بجلی کی بحالی کا کام 16 سے 17 ستمبر تک مکمل کرنے کی توقع ہے۔

لیسکو کے 67 متاثرہ فیڈرز میں سے 63 مکمل اور 4 کو جزوی طور پر بحال کر دیا گیا ہے۔

(جاری ہے)

4825 متاثرہ صارفین کیلئے بجلی کی بحالی کا کام 16 ستمبر تک مکمل کرنے کی توقع ہے جبکہ لیسکو کے زیرِ انتظام علاقے لاہور، ننکانہ اور شیخوپورہ میں بجلی کی بحالی کا کام مکمل کر لیا گیا ہے۔ میپکو کے 180 متاثرہ فیڈرز میں سے 7 مکمل اور 166کو جزوی طور پر بحال کر دیا گیا ہے۔

میپکو کے زیرِ انتظام علاقوں میں پانی اترتے ہی متاثرہ فیڈرز کی مکمل بحالی کا کام شروع ہو جائے گا۔رپورت کے مطابق گیپکوکے کے 11 گرڈز اور 103فیڈرز متاثر ہوئے۔ متاثرہ فیڈرز میں سے 96 فیڈرز مکمل اور 7 کو جزوی طور پر بحال کر لیا گیا ہے، 1130 متاثرہ صارفین کیلئے بجلی بحالی کا کام سیلاب کا پانی اترنے پر مکمل کر لیا جائے گا۔ پیسکو کے 87 فیڈرز مکمل اور 4 کو جزوی طور پر بحال کردیا گیا ہے جبکہ سوات، صوابی اور ڈی آئی خان میں بجلی کی بحالی کا کام مکمل ہو چکا ہے۔

مزید برآں ٹیسکو کے علاقے شمالی وزیرستان اور خیبر کے 18 فیڈرز متاثر ہوئے، 17 فیڈر کو مکمل اور 1 فیڈر جزوی طور پر بحال کر لیا گیا ہے، 996 متاثرہ صارفین کیلئے بجلی کی بحالی کا کام تقریباَ 15 ستمبر تک مکمل ہونے کی توقع ہے، خیبر میں بجلی کی بحالی کا کام مکمل کرلیا گیا ہے۔ ہیزیکو کے زیرِ انتظام علاقے مانسہرہ کے 3 متاثرہ فیڈر کو مکمل طور پر بحال کر دیا گیا ہے۔