Live Updates

سیالکوٹ، محکمہ زراعت نے سیلاب سے متاثرہ علاقوں میں دھان کی بہتر نگہداشت بارے سفارشات جاری کر دیں

پیر 15 ستمبر 2025 17:58

سیالکوٹ (اُردو پوائنٹ اخبارتازہ ترین - اے پی پی۔ 15 ستمبر2025ء) محکمہ زراعت نے سیلاب سے متاثرہ علاقوں میں دھان کی بہتر نگہداشت بارے سفارشات جاری کر دی ہیں۔ ترجمان محکمہ زراعت سیالکوٹ کے مطابق سیلاب سے متاثرہ علاقوں میں دھان کی فصل کی بہتر نگہداشت کے لیے کاشتکار فوری اور محتاط اقدامات کریں تاکہ ممکنہ نقصان کو کم سے کم کیا جا سکے،سیلابی پانی کے اخراج کے بعد کھیتوں میں کھڑے زائدپانی کو فوری طور پر نکالنا، زمین کو ہموار کرنا اور جڑی بوٹیوں کی تلفی بے حد ضروری ہے تاکہ فصل کی نشوونما متاثر نہ ہو۔

ترجمان نے کہا کہ کاشتکار کھیتوں میں موجود پانی کے تجزئیے پر بھی توجہ دیں کیونکہ اکثر سیلابی پانی مٹی میں نمکیات اور دیگر مضر اجزاء شامل کر دیتا ہے،اس مقصد کے لیے مٹی اور پانی کے سیمپل قریبی زرعی لیبارٹری سے چیک کروائے جائیں۔

(جاری ہے)

ترجمان محکمہ زراعت پنجاب نے مزید کہا کہ کاشتکار دھان کی فصل میں بیماریوں اور کیڑوں کی باقاعدہ نگرانی کریں،سیلاب کے بعد دھان کی بیماریاں مثلاً جڑ کی سڑن، تنے کی بیماری، بھونڈ اور تنے کے کیڑے وغیرہ حملہ آور ہو سکتے ہیں،کاشتکار کسی بھی بیماری یا کیڑوں کے حملہ کی صورت میں محکمہ زراعت کے مقامی زرعی ماہرین کے مشورہ سے سپرے کریں،سپرے سے قبل وقفہ قبل از برداشت کو لازماً نوٹ کر لیں،کھادوں کا متوازن استعمال اس وقت انتہائی اہمیت رکھتا ہے،دھان کی فصل میں محکمہ زراعت کے مقامی زرعی ماہرین کے مشورہ سے نائٹروجن کھاد کے ساتھ ساتھ پوٹاش کا استعمال بھی کیا جائے تاکہ پودوں کی قوتِ مدافعت بہتر ہو اور پیداوار پر منفی اثرات کم ہوں۔