Live Updates

وزیر اعلی مریم نواز کا سیلاب سے متاثرہ علی پورشہر کا دورہ ، جاں بحق ہونے والے افراد کے لواحقین کو امدادی رقوم کے چیک پیش ، فلڈ ریلیف کیمپ کا معائنہ

پیر 15 ستمبر 2025 20:00

لاہور (اُردو پوائنٹ اخبارتازہ ترین - اے پی پی۔ 15 ستمبر2025ء) وزیر اعلی پنجاب مریم نواز مظفر گڑھ کی تحصیل علی پور پہنچ گئیں،انہوں نے سیلاب سے متاثر علی پورشہر کا دورہ کیا۔ انہوں نے گورنمنٹ ہائی سکول علی پور میں قائم فلڈ ریلیف کیمپ کا معائنہ کیا اور سیلاب کے دوران جاں بحق ہونے والے افراد کے لواحقین کو امدادی رقوم کے چیک پیش کئے۔وزیراعلی نے سیلاب متاثرین سے گفتگو کی اور ان میں گھل مل گئیں۔

انہوں نے سیلاب متاثرہ خواتین کو دلاسہ دیا اور نقصانات کے ازالے کی یقین دہانی کرائی۔ انہوں نے دیگ سے خود سالن ڈال کر سیلاب متاثرین کو پیش کیا، خود جاکر ہر خاتون اور بچوں کو کھانا پیش کرتی رہیں خود بھی سیلاب متاثرہ خواتین کے ساتھ بیٹھ کر کھانا کھایا۔ ننھی بچیاں وزیراعلی سے لپٹ گئیں اور انہیں پیار کیا۔

(جاری ہے)

وزیر اعلی نے فلڈ ریلیف کیمپ میں کمسن بچی کی خواہش پر کرکٹ کھیلی، بال کرائی اور ہٹ کرنے پر بچی کو داد دی۔

انہوں نے فلڈر یلیف کیمپ کے عارضی کلاس روم میں بچوں سے ہلکے پھلکے انداز میں گپ شپ کی اور بچوں سے پڑھائی کے بارے میں پوچھا۔ وزیراعلی نے سیلاب متاثرین سے فلڈ ریلیف کیمپ میں میسر سہولتوں کے بارے میں دریافت کیامتاثرہ خاندانوں کو تحائف پیش کئے۔وزیراعلی نے امدادی سرگرمیوں میں معاونت پر پاک نیوی کا خصوصی طور پر شکریہ ادا کیا۔وزیراعلی کوڈپٹی کمشنر مظفرگڑھ اور ڈی جی پی ڈی ایم اے نے بریفنگ دی۔

بریفنگ میں بتایاگیا کہ سیلاب سے ضلع مظفر گڑھ کے 147 موضع،3 لاکھ 94ہزار سے زائد آبادی متاثر ہوئی۔ سیلاب سے زیادہ متاثرہونے والی تحصیل علی پور کے 26 موضع زیر آب آئے۔سیلاب متاثرین کے لئے 37 فلڈ ریلیف کیمپ اور 8 ٹینٹ سٹی قائم کیے گئے ہیں۔ فلڈ ریلیف کیمپوں میں متاثرین کو کھانا، میڈیسن اور دیگرسہولتیں فراہم کی جارہی ہیں۔