چیف سیکرٹری خیبرپختونخوا شہاب علی شاہ کی زیرصدارت اجلاس

پشاور(اُردو پوائنٹ اخبارتازہ ترین - این این آئی۔ 15 ستمبر2025ء)چیف سیکرٹری خیبرپختونخوا شہاب علی شاہ کی زیرصدارت گورننس امور پر ہفتہ وار جائزہ اجلاس منعقد ہوا جس میں تجاوزات کے خاتمے، اشیائے خورونوش کی قیمتوں، ماحولیاتی تحفظ اور سیلاب سے بچاؤ کے لئے نکاسی آب کے اقدامات کا تفصیلی جائزہ لیا گیا۔ اجلاس میں انتظامی سیکرٹریز اور دیگر اعلیٰ حکام شریک ہوئے جبکہ ڈپٹی کمشنرز نے ویڈیو لنک کے ذریعے شرکت کی۔

اجلاس کو بریفنگ دیتے ہوئے بتایا گیا کہ صوبہ بھر میں تجاوزات کے خلاف آپریشن میں خاطر خواہ پیشرفت ہوئی ہے اور گزشتہ ہفتے کے دوران چارسدہ، ہری پور، مردان، شانگلہ، نوشہرہ، ایبٹ آباد اور ڈیرہ اسماعیل خان میں وہ تمام غیر قانونی تجاوزات ہٹائی گئی ہیں جن کی نشاندہی کی گئی تھی۔

(جاری ہے)

چیف سیکرٹری نے تمام محکموں کو ہدایت کی کہ وہ اپنی ملکیتی زمینوں پر قائم تجاوزات کی نشاندہی کریں اور ضلعی انتظامیہ کی مدد سے ان تجاوزات کا خاتمہ یقینی بنائیں۔

انہوں نے دریاؤں اور شہری علاقوں میں رکاوٹیں دور کرنے اور تجاوزات کے خاتمے کے بعد حدود واضح کرنے کی ہدایت کی۔ اجلاس میں بونیر کے علاقے پیر بابا اور پشاور کے بڈھنی نالہ میں تجاوزات کے معاملات کا بھی جائزہ لیا گیا۔اشیائے خورونوش کے حوالے سے سیکرٹری خوراک نے آٹے کی دستیابی پر بریفنگ دیتے ہوئے بتایا کہ حکومت پنجاب سے رابطے کے ذریعے گندم کی سپلائی بہتر بنانے کی کوششیں کی جا رہی ہیں تاکہ عوام کو ریلیف فراہم کیا جا سکے۔

سیلاب سے بچاؤ کے اقدامات پر بریفنگ میں بتایا گیا کہ صوبے میں 334 آبی گذرگاہوں کی نشاندہی کی گئی ہے جبکہ تقریباً ایک ہزار کلومیٹر ندی نالوں کی نکاسی و صفائی کے منصوبے تیار کئے گئے ہیں۔ محکمہ آبپاشی نے قلیل مدتی ڈی سلٹنگ مہم اور طویل مدتی ری ماڈلنگ پر مشتمل حکمت عملی سے اجلاس کو آگاہ کیا۔اجلاس میں پبلک پرائیویٹ پارٹنرشپ منصوبوں پر بھی پیشرفت کا جائزہ لیا گیا۔

اس موقع پر بتایا گیا کہ گلیات ڈویلپمنٹ اتھارٹی کے لئے سالڈ ویسٹ مینجمنٹ منصوبے کی منظوری دی گئی ہے۔ چیف سیکرٹری نے ڈویلپمنٹ اتھارٹیز کو ہدایت کی کہ جاری تعمیرات کے لئے جیو ٹیکنیکل جائزے کرائے جائیں اور نئے منصوبوں کے لئے این او سی صرف مکمل جانچ پڑتال کے بعد جاری کئے جائیں۔ اس ضمن میں قوائد و ضوابط کے خلاف این او سی جاری کرنے والوں کے خلاف سخت کارروائی کی ہدایت بھی کی گئی۔