Live Updates

د ریائے راوی، ستلج اور چناب میں سیلاب کے باعث ہونے والے نقصانات کی رپورٹ جاری

منگل 16 ستمبر 2025 16:48

لاہور (اُردو پوائنٹ اخبارتازہ ترین - اے پی پی۔ 16 ستمبر2025ء) دریائے راوی، ستلج اور چناب میں شدید سیلابی صورتحال کے باعث 47سو سے زائد موضع جات متاثر ہو چکے ہیں ۔ ریلیف کمشنر پنجاب نبیل جاوید نے میڈیا کوتفصیلات بتاتے ہوئے کہا کہ دریاوں میں سیلابی صورتحال کے باعث مجموعی طور پر 47 لاکھ 21 ہزار لوگ متاثر ہوئے۔ شدید سیلاب سے متاثرہ اضلاع میں 363 ریلیف کیمپس قائم کیے گئے ہیں۔

سیلاب سے متاثر ہونے والے اضلاع میں 446 میڈیکل کیمپس بھی قائم کیے گئے ہیں۔سیلاب میں پھنس جانے والے 26 لاکھ 08 ہزار لوگوں کو محفوظ مقامات پر منتقل کیا گیا ہے ۔مویشیوں کو علاج معالجے کی سہولت فراہم کرنے کے لیے 382 ویٹرنری کیمپس قائم کیے گئے ہیں۔متاثرہ اضلاع میں ریسکیو و ریلیف سرگرمیوں میں 20 لاکھ 87 ہزار جانوروں کو محفوظ مقامات پر منتقل کیا گیا۔

(جاری ہے)

ریلیف کمشنر پنجاب نے کہا کہ منگلا ڈیم 94 فیصد جبکہ تربیلا ڈیم 100 فیصد تک بھر چکا ہے۔دریائے ستلج پر موجود انڈین بھاکڑا ڈیم 88 فیصد تک بھر چکا ہے۔ پونگ ڈیم 94 فیصد جبکہ تھین ڈیم 88 فیصد تک بھر چکا ہے۔انہوں نے کہا کہ حالیہ سیلاب سے مختلف حادثات میں 112 شہری جاں بحق ہوئے۔وزیر اعلی پنجاب کی ہدایات کے پیش نظر شہریوں کے نقصانات کا ازالہ کیا جائے گا۔سیلاب کے باعث ہونے والے نقصانات کا تخمینہ لگانے کے لیے سروے کا آغاز کر دیا گیا ہے۔ سروے مکمل ہونے پر شفافیت اور آسان طریقہ کار سے شہریوں کے نقصانات کا ازالہ کیا جائے گا۔