وائس چانسلر پروفیسر ڈاکٹر گل حسن کی زیر صدارت یونیورسٹی آف تربت ماڈل اسکول کے بورڈ آف ٹرسٹیز کا پہلا اجلاس

کوئٹہ (اُردو پوائنٹ اخبارتازہ ترین - اے پی پی۔ 16 ستمبر2025ء) یونیورسٹی آف تربت ماڈل اسکول کے بورڈ آف ٹرسٹیز کا پہلا اجلاس وائس چانسلر پروفیسر ڈاکٹر گل حسن کی زیر صدارت وائس چانسلر سیکریٹریٹ میں منعقد ہوا۔اجلاس میں پرو وائس چانسلر ڈاکٹر منصور احمد، رجسٹرار گنگزار بلوچ، ڈائریکٹر فنانس شاہ بیک سید، ڈسٹرکٹ ایجوکیشن آفیسر کیچ منظور احمد، ڈسٹرکٹ ایجوکیشن آفیسر خضدار عابد حسین اور ڈائریکٹر پبلک ریلیشنز اعجاز احمد نے شرکت کی۔

اجلاس کے آغاز پر اپنے استقبالیہ کلمات میں وائس چانسلر پروفیسر ڈاکٹر گل حسن نے یونیورسٹی ماڈل اسکول کو خطے میں معیاری ایلیمنٹری تعلیم کے فروغ کی جانب ایک سنگ میل قرار دیا۔ انہوں نے کہا کہ یہ ادارہ نہ صرف یونیورسٹی کے ملازمین کے بچوں کومعیاری تعلیم فراہم کررہا ہے بلکہ مقامی کمیونٹی کے لیے بھی ایک معتبر اور معیاری تعلیمی درسگاہ کی حیثیت اختیار کررہا ہے۔

(جاری ہے)

انہوں نے بورڈ ممبران کی بھرپور شرکت اور تعلیمی و انتظامی ڈھانچے کو مزید مستحکم بنانے کے لیے ان کی جانب سے پیش کی گئی مفید تجاویز پر ان کا شکریہ ادا کیا۔بورڈ ممبران نے یونیورسٹی کی اس وژن کو سراہا جس کے تحت مستقبل میں مکران ڈویژن کے مختلف اضلاع میں ماڈل اسکول کے مزید کیمپس قائم کرکے اسے ایک جامع تعلیمی نیٹ ورک کی شکل دینے کا منصوبہ ہے۔

اجلاس میں طے پایا کہ اسکول کے تمام تعلیمی، انتظامی، مالی اور ترقیاتی معاملات بورڈ آف ٹرسٹیز کے ذریعے سرانجام دیے جائیں گے اجلاس کے دوران متعدد اہم فیصلے کیے جن میں تعلیمی کیلنڈر کی تیاری، طلبہ کے یونیفارم کی حتمی توثیق اور نصابی کتب کی فراہمی کے لیے آکسفورڈ یونیورسٹی پریس کے ساتھ الحاق شامل تھا۔ اس کے علاوہ فیس اسٹرکچر میں مناسب ردوبدل، تدریسی و غیر تدریسی عملے کی تقرری کاطریقہ کار، تعلیمی سیشنز کا شیڈول، عملے کے لیے چھٹی کے قواعدوضوابط اور آئی ٹی آلات سمیت درس و تدریس کیلئے جدیدآلات کی فراہمی پر بھی غور کیا گیا اجلاس میں اسکول کو درپیش چیلنجز اور اس کی پائیدار ترقی کے لیے جامع حکمت عملی پر تبادلہ خیال کیا گیا اور اس بات پر زور دیا گیا کہ بورڈ آف ٹرسٹیز کے اجلاس باقاعدگی کے ساتھ منعقد کیے جائیں گے تاکہ اسکول کی پیش رفت کو موثر انداز میں جاری رکھا جا سکے۔

اس موقع پر اسکول کی پرنسپل محترمہ مہناز بشیر نے اسکول کی اب تک کی کارکردگی پر روشنی ڈالتے ہوئے بتایا کہ 2022 میں قیام کے بعد سے اسکول تیزی سے ترقی کی جانب گامزن ہے اور اس وقت 358 طلبہ جدید سہولیات کے ساتھ قابل اساتذہ کی رہنمائی میں معیاری تعلیم حاصل کررہے ہیں۔ بورڈ ممبران نے اسکول کی مختصر عرصے میں نمایاں کامیابیوں کو سراہتے ہوئے مہناز بشیر اور ان کی ٹیم کی کاوشوں کی تعریف کی۔