وزیراعلی سندھ سید مراد علی شاہ کاصوبے میں گندم کے ذخائر اور فراہمی کی صورتحال کا جائزہ

منگل 16 ستمبر 2025 20:20

کراچی (اُردو پوائنٹ اخبارتازہ ترین - اے پی پی۔ 16 ستمبر2025ء) وزیراعلی سندھ سید مراد علی شاہ نے صوبے میں گندم کے ذخائر اور فراہمی کی صورتحال کا جائزہ لیتے ہوئے اعلان کیا ہے کہ صوبے کے پاس فروری کے اختتام تک کیلئے وافر ذخائر موجود ہیں جبکہ نئی گندم کی فصل مارچ میں دستیاب ہوگی۔منگل کو وزیر اعلی ہائوس سے جاری اعلامیہ کے مطابق یہ بات انہوں نے وزیراعلی ہائوس میں اجلاس کی صدارت کرتے ہوئے کہی۔

اجلاس میں چیف سیکرٹری آصف حیدر شاہ، وزیراعلی کے مشیر برائے خوراک جبار خان، سیکرٹری خزانہ فیاض جتوئی، سیکرٹری وزیراعلی عبد الرحیم شیخ، سیکرٹری زراعت زمان ناریجو اور دیگر اہم حکام شریک تھے جبکہ صوبائی وزیر آبپاشی جام خان شورو اور وزیر زراعت محمد بخش مہر ویڈیو لنک کے ذریعے شریک ہوئے۔

(جاری ہے)

اجلاس کو بتایا گیا کہ اس وقت سندھ کے پاس 13لاکھ ٹن گندم کا ذخیرہ موجود ہے۔

وزیراعلی کے سوال پر بتایا گیا کہ سندھ اور بلوچستان کے لیے مشترکہ طور پر ماہانہ گندم کی ضرورت 4لاکھ ٹن ہے جبکہ عام مارکیٹ میں مزید 6لاکھ ٹن گندم دستیاب ہے۔وزیراعلی سندھ نے کہا کہ موجودہ ذخائر صوبے کو فروری 2026 تک سہارا دینے کے لیے کافی ہیں۔اس موقع پر حکام نے بتایا کہ نئی فصل مارچ میں آنے کی توقع ہے جس سے سپلائی کا تسلسل قائم رہے گا۔

وزیراعلی نے اسٹریٹجک ذخائر برقرار رکھنے کی اہمیت پر زور دیا اور ہدایت دی کہ فوڈ سکیورٹی یقینی بنانے کے لیے بروقت انتظامات کیے جائیں۔ انہوں نے محکمہ خوراک کو ہدایت دی کہ گندم اجرا ءپالیسی تیار کرکے حکومت کو منظوری کے لیے پیش کی جائے۔سید مراد علی شاہ نے مزید کہا کہ گندم کے آٹے کی قیمتوں کی سخت نگرانی کی جائے تاکہ دستیاب ذخائر کے باوجود کسی غیر ضروری اضافہ سے بچا جا سکے اور عوام کو مناسب قیمت پر آٹا میسر رہے۔انہوںنے صوبے کے عوام کے لیے غذائی تحفظ اور قیمتوں کے استحکام کو یقینی بنانے کے اپنے عزم کا اعادہ کیا۔