وفاق جلد از جلد افغانستان کے ساتھ بات چیت کے لیے وفد بھیجنے کا فیصلہ کرے، بیرسٹر سیف

بدھ 17 ستمبر 2025 20:05

پشاور(اُردو پوائنٹ اخبارتازہ ترین - این این آئی۔ 17 ستمبر2025ء)وزیر اعلیٰ خیبر پختونخوا کے مشیر اطلاعات و تعلقات عامہ بیرسٹر ڈاکٹر سیف نے وفاق سے کہا ہے کہ وہ جلد از جلد افغانستان کے ساتھ بات چیت کے لیے وفد بھیجنے کا فیصلہ کرے، بصورتِ دیگر خیبر پختونخوا حکومت کا جرگہ افغانستان جانے کے لیے تیار ہے۔ انہوں نے کہا کہ خیبر پختونخوا دہشت گردی کے خلاف فرنٹ لائن صوبہ ہے اور دہشت گردی کا سارا بوجھ خیبر پختونخوا حکومت نے اپنے کندھوں پر اٹھایا ہوا ہے،خیبر پختونخوا کی قربانیوں کی وجہ سے باقی ملک دہشت گردی کی آگ سے محفوظ ہے،وفاقی حکومت ہوش کے ناخن لے اور اس اہم مسئلے کو سنجیدگی سے دیکھے۔

بیرسٹر ڈاکٹر سیف نے کہا کہ ہر چیز پر سیاست نہیں کی جا سکتی، یہ انسانی زندگیوں کا معاملہ ہے، وفاق یا تو خود افغانستان سے رابطہ کرے یا خیبر پختونخوا کو اجازت دے۔

(جاری ہے)

انہوں نے کہا کہ اگر دہشت گردی کی آگ خیبر پختونخوا سے باہر پھیلی تو پورا ملک اس کی لپیٹ میں آ جائے گا ایسے وقت میں افغانستان کو نظر انداز کرنا وفاقی حکومت کی بڑی غلطی ہے۔

بیرسٹر ڈاکٹر سیف نے کہا کہ اس سلسلے میں خیبر پختون خوا حکومت نے کئی ماہ پہلے ٹی اور ارز بھی بھیجے لیکن تاحال کوئی جواب نہیں ملا ہے۔ انہوں نے کہا کہ وزیراعلیٰ علی امین خان گنڈاپور امن و امان قائم کرنے کے لئے انتہائی سنجیدہ ہیںاس سلسلے میں قبائلی جرگے بھی منعقد کئے گئے ہیں۔ بیرسٹر ڈاکٹر سیف نے کہا کہ خیبر پختونخوا کو پرامن بنانے کے لئے وزیر اعلیٰ علی امین خان گنڈاپور کی قیادت میں صوبائی حکومت سنجیدہ اقدامات اٹھارہی ہے وفاق کو بھی چاہئے کہ دہشت گردی کے خاتمے کے لئے سنجیدگی کا مظاہرہ کرے ۔