Live Updates

وفاقی حکومت نے سیلاب متاثرین کیلئے اگلے 24 سے 48 گھنٹوں میں پیکیج لانے کا اعلان کردیا

بدھ 17 ستمبر 2025 21:05

اسلام آباد (اُردو پوائنٹ اخبارتازہ ترین - این این آئی۔ 17 ستمبر2025ء)حکومت نے سیلاب متاثرین کیلئے اگلے 24 سے 48 گھنٹوں میں پیکیج لانے کا اعلان کر دیا ہے۔ سیکرٹری پاور ڈویژن کی جانب سے قومی اسمبلی کی قائمہ کمیٹی توانائی کو بریفنگ میں بتایا گیا کہ سیلاب متاثرین کیلئے پیکیج لایا جا رہا ہے۔سیکرٹری فخر عالم عرفان نے کہا سیلاب متاثرین کو بجلی کے بلوں میں ریلیف دینے پر کام کر رہے ہیں، ایک دو روز میں سیلاب متاثرین سے متعلق ریلیف سامنے آ جائے گا۔

(جاری ہے)

سیکرٹری نے کہا کہ سیلاب متاثرہ علاقوں میں ریلیف کیلئے آئی ایم ایف کے ساتھ رابطے میں ہیں، وزارت خزانہ کے ساتھ بھی ریلیف پیکیج کیلئے بات چیت کر رہے ہیں۔سیکرٹری پاور ڈویژن نے بریفنگ میں بتایا کہ گزشتہ سال 640 ارب ہدف کے برعکس 397 ارب روپے کا نقصان ہوا ہے، رواں مالی سال کیلئے بجلی نقصانات کا ہدف 540 ارب روپے مقرر کیا گیا ہے۔ انہوں نے کہا حیسکو اور سیپکو کے بورڈز کی تنظیم نو آئندہ چند روز میں کر دی جائے گی، بورڈز میں اکثریت پرائیویٹ سیکٹر کے ممبران کی ہوگی، کوشش کی گئی ہے کہ بورڈز میں نجی شعبے سے ماہرین کی خدمات لی جائیں۔