Live Updates

میچ کھیل سکتے ہیں تو ہمیں بھی پاکستان جانے کی اجازت ہو، سکھ برادری کا بھارتی حکومت پر زور

جمعرات 18 ستمبر 2025 09:00

نئی دہلی (اُردو پوائنٹ اخبارتازہ ترین - اے پی پی۔ 18 ستمبر2025ء) سکھ برادری کے رہنماؤں نے بھارتی حکومت پر زور دیا ہے کہ پاکستان میں داخلے پر عائد پابندی اٹھائی جائے تاکہ نومبر میں بابا گرونانک کے یوم پیدائش کی تقریبات میں شامل ہو سکیں۔خبر رساں ادارے ایسوسی ایٹڈ پریس کے مطابق پاکستان سکھ گردوارہ پربندھک کمیٹی کے نائب صدر مہیش سنگھ نے انڈین حکومت سے اپیل کی ہے اور سفری پابندی کو بین الاقوامی اقدار کی خلاف ورزی قرار دیا ہے۔

خیال رہے کہ 12 ستمبر کو بھارتی حکومت نے سکیورٹی وجوہات کی بنیاد پر پاکستان کے سفر پر پابندی عائد کر دی تھی۔کرتار پور میں واقع دربار صاحب گردوارہ سکھ مذہب کے پیروکاروں کے لیے دوسرا مقدس ترین مقام ہے۔مہیش سنگھ کا کہنا ہے کہ ہزاروں کی تعداد میں انڈین سکھ بابا گرو نانک کے 556 ویں یوم پیدائش کی تقریبات میں شامل ہونے کے لیے پرامید ہیں۔

(جاری ہے)

انہوں نے کہا کہ حکومت پاکستان نے کمیٹی کو یقین دہانی کروائی ہے کہ ’انڈین سکھ یاتریوں کے لیے دروازے کھلے ہیں‘ اور نیو دہلی میں پاکستانی ہائی کمیشن کی جانب سے ویزے جاری کیے جائیں گے۔انہوں نے سوشل میڈیا پلیٹ فارم ایکس پر لکھا، ’اگر انڈیا اور پاکستان کرکٹ میچز کھیل سکتے ہیں تو سکھوں کو بھی مذہبی رسومات میں حصہ لینے کے لیے پاکستان جانے کی اجازت ہونی چاہیے۔انہوں نےبھارتی حکومت سے اپیل کی کہ سکھوں کے جذبات سے نہ کھیلا جائے۔