عید میلاد النبیؐ جلوس کیلئے راولپنڈی ٹریفک پولیس کا خصوصی ٹریفک پلان جاری

جمعرات 18 ستمبر 2025 16:13

راولپنڈی (اُردو پوائنٹ اخبارتازہ ترین - اے پی پی۔ 18 ستمبر2025ء) سٹی ٹریفک پولیس راولپنڈی نے عید میلاد النبیؐ کے سلسلے میں 19 ستمبر بروز جمعتہ المبارک چوہڑ چوک جلوس کے حوالے سے خصوصی ٹریفک پلان جاری کر دیا ہے۔ چیف سکیورٹی آفیسر ٹریفک انسپکٹر محمد وسیم کے مطابق جلوس بعد از نماز جمعہ علی پلازہ سے شروع ہو گا اور مقررہ راستوں سے ہوتا ہوا واپس چوہڑ چوک پر اختتام پذیر ہوگا۔

اس موقع پر ڈائیورشن اور ٹریفک کو متبادل راستوں پر رواں دواں رکھنے کیلئے 170 سے زائد افسران و جوان ڈیوٹی پر تعینات ہوں گے۔انہوں نے بتایا کہ جلوس کے دوران دربار شاہ پیارا روڈ، آلہ آباد روڈ، غازی روڈ، آشیانہ چوک اور محمد آباد تا پراگریسو سکول تک روٹس ٹریفک کیلئے بند رہیں گے جبکہ پشاور روڈ سے صدر آنیوالی ٹریفک کو مہر آباد آغاز فلائی اوور سے کرنل شیر خان شہید روڈ کی جانب ڈائیورٹ کیا جائے گا۔

(جاری ہے)

اسی طرح مصریال روڈ جابہ پلی سے چوہڑ چوک تک مکمل طور پر بند ہو گا، بھاٹہ چوک سے چوہڑ چوک جانیوالی ٹریفک رینج روڈ کی طرف موڑ دی جائے گی جبکہ صدر سے پشاور جانیوالی ٹریفک رافع مال ٹرن سے مخالف سمت روڈ استعمال کر سکے گی۔سی ٹی او راولپنڈی فرحان اسلم نے کہا کہ جلوس کے دوران تمام افسران و جوان اپنی ذمہ داریاں پوری محنت اور ذمہ داری سے انجام دیں، بغیر نمبر پلیٹ موٹر سائیکلوں اور گاڑیوں پر خصوصی نظر رکھی جائے اور جلوس کے راستوں کے قریب کسی بھی قسم کی پارکنگ کی اجازت نہیں دی جائے گی۔