فیصل آباد میں ویسٹ واٹر ٹریٹمنٹ پلانٹ لگانے بارے پاکستان اور ڈنمارک کے درمیان معاہدے پر دستخط

جمعہ 19 ستمبر 2025 12:11

اسلام آباد (اُردو پوائنٹ اخبارتازہ ترین - اے پی پی۔ 19 ستمبر2025ء) ِ پاکستان اور ڈنمارک نے فیصل آباد میں ویسٹ واٹر ٹریٹمنٹ پلانٹ لگانے کیلئے رعایتی قرض کے پروگرام پر دستخط کرئیے ہیں۔وزارت اقتصادی امورکے مطابق ڈنمارک کی حکومت ڈینیڈا سسٹین ایبل انفراسٹرکچر فنانس ڈی ایس آئی ایف کے تحت فیصل آباد کے مشرقی علاقے میں ویسٹ واٹر ٹریٹنمٹ پلانٹ لگائے گی جس کے ذریعے روزانہ 33 ملین گیلن پانی کو صاف کیا جائے گا۔

(جاری ہے)

معاہدے پر سیکرٹری وزارتِ اقتصادی امور محمد حمیر کریم، ڈی ایس آئی ایف کی مینجنگ ڈائریکٹر ٹینا کلرپ ہاؤسن، اور ڈینسکے بینک کے منیجنگ ڈائریکٹر جیسپرپیٹرسن نے دستخط کئے۔ یہ اہمیت کاحامل منصوبہ پاکستان کے ترقیاتی شعبے میں ڈینیڈا کا طویل عرصے بعد پہلا قدم ہے۔ مزید برآں یہ پاکستان ڈنمارک فریم ورک معاہدے کے تحت دستخط کیا جانے والا پہلا قرض ہے جو 2022 میں طے پایا تھا۔ معاہدہ سے شراکت داروں کے تعاون کو مضبوط بناتے ہوئے شہری مسائل سے نمٹنے کے لئے حکومت پاکستان کے عزم کی عکاسی ہورہی ہے ۔ یہ منصوبہ نہ صرف فیصل آباد میں گندے پانی کی صفائی کے لئے مددگار ثابت ہوگا بلکہ ماحولیاتی تحفظ، صحتِ عامہ اور شہری بنیادی ڈھانچہ کو بھی سپورٹ کرے گا۔