اقوامِ متحدہ انسانیت کی آخری امید ،بقا ناگزیر ہے، شیخ محمد بن راشد المکتوم

جمعہ 19 ستمبر 2025 20:05

ابو ظہبی (اُردو پوائنٹ اخبارتازہ ترین - این این آئی۔ 19 ستمبر2025ء)متحدہ عرب امارات کے نائب صدر اور وزیر اعظم شیخ محمد بن راشد المکتوم نے اقوامِ متحدہ کو انسانیت کی آخری امید قرار دیتے ہوئے کہا ہے کہ عالمی ادارے کی بقا آئندہ 80برس کیلئے ناگزیر ہے۔اقوامِ متحدہ کے قیام کے 80برس مکمل ہونے پر اپنے خصوصی ویڈیو پیغام میں متحدہ عرب امارات کے نائب صدر اور وزیرِ اعظم نے کہا کہ آج دنیا کو درپیش پیچیدہ عالمی چیلنجز اس بات کا تقاضہ کرتے ہیں کہ اقوامِ متحدہ کے اصولوں اور اقدار کو ازسرِنو زندہ کیا جائے تاکہ عالمی امن و سلامتی کو یقینی بنایا جا سکے۔

انہوں نے کہا کہ متحدہ عرب امارات کی خارجہ پالیسی ہمیشہ برداشت، مکالمے اور پائیدار ترقی پر مبنی رہی ہے۔شیخ محمد بن راشد نے دنیا کو یاد دلاتے ہوئے کہا کہ عرب امارات نے انسانی امداد کو اپنا نصب العین بنایا اور انسدادِ دہشت گردی کے ساتھ ساتھ نفرت انگیز بیانیے اور انتہا پسندی کے خلاف ہمیشہ فعال کردار ادا کیا ہے۔

(جاری ہے)

انہوں نے کہا کہ اقوامِ متحدہ کی بنیاد امن، انصاف اور انسانی وقار کے تحفظ پر رکھی گئی تھی اور آج بھی اس ادارے کی ذمے داری ہے کہ وہ اپنے وعدوں کو نئے عزم کے ساتھ پورا کرے۔

انہوں نے کہا کہ فلسطینیوں کی موجودہ صورتِ حال میں عرب دنیا میں یہ خیال تقویت پکڑ رہا ہے کہ مشرقِ وسطی سمیت دنیا بھر میں سیکیورٹی چیلنجز شدید تر ہو رہے ہیں اور ان مسائل کے حل کیلئے اقوامِ متحدہ کو مزید موثر کردار ادا کرنے کا مطالبہ زور پکڑ رہا ہے۔