Live Updates

وزیراعلی سندھ سے ترکیہ کے قونصل جنرل اور بنگلہ دیشی ڈپٹی ہائی کمشنرکی ملاقاتیں

پیر 22 ستمبر 2025 21:02

کراچی (اُردو پوائنٹ اخبارتازہ ترین - اے پی پی۔ 22 ستمبر2025ء) وزیر اعلی سندھ سید مراد علی شاہ سے نئے تعینات ہونے والے ترکیہ کے قونصل جنرل ارگل کاداک اور بنگلہ دیش کے نئے ڈپٹی ہائی کمشنرمحمد ثاقب صدا قت نے وزیر اعلی ہائوس میں الگ الگ ملاقات کیں۔پیر کو وزیراعلی ہائوس سے جاری اعلامیہ کے مطابق وزیر ِاعلی سندھ نے دونوں سفارت کاروں کاخیرمقدم کرتے ہوئے سندھ حکومت کی مکمل حمایت کی یقین دہانی کرائی اور برادر مسلم ممالک کے ساتھ تعلقات کو مزید مضبوط بنانے کی اہمیت پر زور دیا۔

ترکیہ کے قونصل جنرل سے ملاقات کے دوران سیدمراد علی شاہ نے کہا کہ پاکستان اور ترکیہ کے درمیان تاریخی تعلقات قائم ہیں ،ضرورت اس بات کی ہے کہ دو طرفہ تجارت کو مزید فروغ دیا جائے۔اس موقع پر انہوں نے قونصل جنرل کو سندھ میں جاری بڑے منصوبوں کے بارے میں آگاہ کیا جن میں سڑکوں، توانائی اورپانی کے شعبے شامل ہیں۔

(جاری ہے)

وزیراعلی سندھ نے انہیں کراچی میں عوامی ٹرانسپورٹ کے منصوبوں میں سرمایہ کاری کی دعوت دی جو اکیس ملین سے زائد آبادی کا شہر ہے۔

ترکیہ کے قونصل جنرل نے کراچی کی مہمان نوازی کو سراہتے ہوئے اسے محبت کرنے والے لوگوں کا عظیم شہر قرار دیا اور سرمایہ کاری میں گہری دلچسپی کا اظہار کیا۔ اس موقع پرطے پایا کہ سندھ کے سرمایہ کاری محکمے کا سربراہ ترکیہ کے قونصل جنرل سے ممکنہ منصوبوں پر تفصیلی بات چیت کرے گا۔بنگلہ دیش کے ڈپٹی ہائی کمشنر سے ملاقات میں وزیر ِاعلی نے کہا کہ پاکستان اور بنگلہ دیش برادر مسلم ممالک ہیں اور تجارتی تعاون کو فروغ دینے کی ضرورت ہے،دونوں فریقین نے دو طرفہ تعلقات کو مزید مضبوط بنانے کے طریقوں پر بات چیت کی اور پاکستان میں حالیہ سیلاب کی صورتِ حال پر بھی تبادلہ خیال کیا۔

وزیرِاعلی سندھ نے ایک بار پھر اس عزم کااظہار کیا کہ سندھ ترکیہ اور بنگلہ دیش کے ساتھ تعلقات کو قدر کی نگاہ سے دیکھتاہے اور تجارت، سرمایہ کاری اور ترقیاتی منصوبوں میں تعاون کو وسعت دینے کا خواہاں ہے۔