پیر کو نیویارک میں دس ممالک کی کانفرنس میں فلسطین کو باضابطہ ریاست کے طور پر تسلیم کرلیا جائے گا، فرانس

ہفتہ 20 ستمبر 2025 12:45

پیرس (اُردو پوائنٹ اخبارتازہ ترین - اے پی پی۔ 20 ستمبر2025ء) فرانس نے کہا ہے کہ پیر کو اقوام متحدہ کے جنرل اسمبلی کے اجلاس کے موقع پر نیویارک میں دس ممالک کی ایک کانفرنس ہوگی جس میں فلسطین کو باضابطہ ریاست کے طور پر تسلیم کرلیا جائے گا۔

(جاری ہے)

العربیہ ارودو نے فرانس کے صدارتی آفس سے جاری بیان کے حوالے سےبتایا کہ پیر کو ہونے والی کانفرنس میں فرانس،برطانیہ، آسٹریلیا،کینیڈا، بیلجیئم، لکسمبرگ،پرتگال،مالٹا،انڈورا اور سان مارینو شامل ہوں گے جو فلسطین کو بطور ریاست تسلیم کرنے کا باضابطہ اعلان کریں گے۔

فرانس نے خبردار کیا کہ اگر اسرائیل مغربی کنارے کو ضم کرنے کی طرف بڑھتا ہے تو یہ ایک واضح ریڈ لائن ہوگی اور بین الاقوامی قانون کی سنگین خلاف ورزی تصور کی جائے گی۔ ایوان صدر کے ایک عہدیدار ایلیزے نے کہا کہ ہم اور ہمارے شراکت دار اسرائیل سے فوری اقدامات کا مطالبہ کریں گے تاکہ فلسطینی اتھارٹی کا نظام ختم نہ ہو۔انہوں نے کہا کہ مستقبل کی فلسطینی ریاست کی سرحدیں 1967 کی بنیاد پر ہوں گی۔