وزیراعلی خیبر پختونخوا کا چارسدہ روڈ پر قائم محکمہ لائیو اسٹاک کے ماڈل میٹ پروسیسنگ پلانٹ اینڈ ٹریننگ سنٹر پر اچانک چھاپہ، پلانٹ غیر فعال ہونے پر اظہار برہمی

ہفتہ 20 ستمبر 2025 21:20

پشاور (اُردو پوائنٹ اخبارتازہ ترین - اے پی پی۔ 20 ستمبر2025ء) وزیراعلیٰ خیبر پختونخوا علی امین گنڈاپور نے چارسدہ روڈ پر قائم محکمہ لائیو اسٹاک کے ماڈل میٹ پروسیسنگ پلانٹ اینڈ ٹریننگ سنٹر پر اچانک چھاپہ مار کر عرصہ دراز سے غیر فعال رہنے کا سخت نوٹس لیتے ہوئے برہمی کا اظہار کیا۔ وزیراعلیٰ سیکرٹریٹ پشاور کی جانب سے جاری بیان کے مطابق بین الاقوامی معیار کا یہ پراسیسنگ پلانٹ اور ٹریننگ سنٹر گزشتہ آٹھ مہینوں سے بند پڑا ہوا تھا۔

پروسیسنگ پلانٹ میں نصب کروڑوں روپے مالیت کے جدید ساماں اور آلات غیر مستعمل پڑے ہوئے تھے۔وزیراعلیٰ کو بعض ذرائع سے پراسیسنگ پلانٹ عرصہ دراز سے غیر فعال ہونے کی شکایت موصول ہوئی تھیں۔وزیراعلیٰ نے متعلقہ حکام کو 15 اکتوبر تک پراسیسنگ پلانٹ اور ٹریننگ سنٹر کو ہر لحاظ سے فعال بنانے کی ہدایت کی۔

(جاری ہے)

وزیراعلیٰ نے کہا کہ مقررہ وقت میں پلانٹ فعال نہ ہونے کی صورت میں تمام متعلقہ حکام کے خلاف سخت کاروائی عمل میں لائی جائے گی۔

انہوں نے ہدایت کی کہ ٹریننگ سنٹر میں ٹریننگ شروع کرنے کےلئے رجسٹریشن کا عمل فی الفور شروع کیا جائے، ٹریننگ سنٹر میں قائم ماڈل میٹ شاپ کو بھی فعال بنایا جائے، ماڈل ٹریننگ سنٹر میں بین الاقوامی معیار کی سرٹیفکیشن شروع کرنے کےلئے بھی ضروری اقدامات کئے جائیں، صوبے کے دیگر اضلاع میں بھی اسی طرز کے جدید میٹ پراسیسنگ پلانٹس لگانے پر کام کیا جائے، دیگر اضلاع میں بھی اس طرح کے ماڈل پلانٹس لگانے کےلئے نجی سرمایہ کاری کو راغب کیا جائے، محکمہ ایسے سروس ڈیلیوری یونٹس کو بہتر اور پائیدار بنیادوں پر چلانے کے لئے نجی شعبے کے ساتھ شراکت داری کرے۔

وزیراعلیٰ نے کہا کہ اس ماڈل پراسیسنگ پلانٹ کے قیام پر عوام کا پیسہ لگا ہے، جس کے ثمرات بلاتاخیر عوام تک پہنچنے چاہیئے. انہوں نے کہا کہ عوامی خدمات کے ایسے دیگر مراکز پر بھی اچانک چھاپے لگائے جائیں گے۔

Facebook Twitter Google + Share on Whatsapp

وزیراعلی خیبر پختونخوا کا چارسدہ روڈ پر قائم محکمہ لائیو اسٹاک کے ماڈل میٹ پروسیسنگ پلانٹ اینڈ ٹریننگ سنٹر پر اچانک چھاپہ، پلانٹ غیر فعال ہونے پر اظہار برہمی

متعلقہ عنوان :

مزید قومی خبریں