لاہور ہائیکورٹ کا بجلی چوری کے مقدمے میں ملزم کو شک کا فائدہ دیتے ہوئے بری کرنے کا حکم

ہفتہ 20 ستمبر 2025 22:00

لاہور (اُردو پوائنٹ اخبارتازہ ترین - اے پی پی۔ 20 ستمبر2025ء) لاہور ہائیکورٹ نے بجلی چوری کے مقدمے میں ایک سال تین ماہ قید کی سزا کے ملزم کو بری کردیا۔ چیف جسٹس لاہور ہائیکورٹ جسٹس عالیہ نیلم نے ملزم غلام جعفر کی اپیل پر تحریری فیصلہ جاری کردیا۔عدالت نے ملزم غلام جعفر کی ایک سال تین ماہ قید اور ایک لاکھ روپے جرمانے کے خلاف اپیل منظور کرلی۔

عدالت نے ملزم کو شک کا فائدہ دیتے ہوئے بری کرنے کا حکم دے دیا۔

(جاری ہے)

عدالت نے تحریری فیصلے میں لکھا کہ پراسکیوشن کی سٹوری میں بہت سے ابہام ہیں۔پراسکیوشن کے پاس مناسب میٹریل نہیں ہے۔ایف آئی آر کے مطابق ملزم ڈائریکٹ مین لائن سے بجلی چوری کررہا تھا۔پراسکیوشن کے مطابق گیپکو کی ٹیم نے چھاپہ مارا اور بجلی چوری پکڑی۔ٹیم نے موقع سے بجلی کا میٹر اتارا اور مقدمہ درج کرنے کی درخواست دی۔حافظ آباد پولیس نے بجلی چوری کا مقدمہ درج کیا اور ٹرائل کورٹ نے ملزم کو ایک سال تین ماہ قید اور جرمانے کی سزا سنائی۔