Live Updates

سیکرٹری زراعت پنجاب افتخار علی سہو نے جلالپور پیروالہ میں قائم فلڈ ریلیف کیمپس کا خصوصی دورہ

اتوار 21 ستمبر 2025 19:20

ملتان (اُردو پوائنٹ اخبارتازہ ترین - اے پی پی۔ 21 ستمبر2025ء) سیکریٹری زراعت پنجاب افتخار علی سہو نے جلالپور پیروالہ میں قائم فلڈ ریلیف کیمپس کا خصوصی دورہ کیا، جہاں انہوں نے جانوروں کی خوراک، ونڈا، سبز چارہ اور سائلیج کے انتظامات کا جائزہ لیا۔ اس موقع پر سیکرٹری زراعت نے کہا کہ وزیراعلیٰ پنجاب جلد فصلوں کے نقصان کے ازالے کے لیے خصوصی پیکج کا اعلان کریں گی۔

انہوں نے مزید بتایا کہ سیلاب زدہ علاقوں میں کاشتہ فصلوں کے نقصان کے تخمینے کے لیے کمیٹیاں تشکیل دی گئی ہیں جو گاؤں گاؤں جا کر سروے کریں گی ۔

(جاری ہے)

افتخار علی سہو نے کہا کہ سیلاب متاثرین کے جانوروں کے لیے سبز چارہ، ونڈا، توڑی اور سائلیج کی فراہمی یقینی بنائی جارہی ہے جبکہ جانوروں کے علاج کےلئے ویکسینیشن بھی کی جا رہی ہے۔زراعت اور لائیو اسٹاک بہترین کوآرڈینیشن کے ساتھ سیلاب متاثرین کے لیے سہولیات فراہم کر رہے ہیں ۔

بعد ازاں انہوں نے سیلاب متاثرین سے ملاقات کی اور ان سے کھانے، رہائش اور صحت کی سہولتوں کے ساتھ ساتھ جانوروں کے چارے اور علاج معالجے کی فراہمی بارے دریافت کیا۔ اس موقع پر ڈائریکٹر جنرل انفارمیشن محکمہ زراعت پنجاب نوید عصمت کاہلوں اور ڈائریکٹر زراعت توسیع شہزاد صابر بھی موجود تھے۔