فلپائن میں سپر سمندری طوفان کے باعث ہزاروں افراد محفوظ مقامات پر منتقل، تعلیمی ادارے اور دفاتر بند

پیر 22 ستمبر 2025 12:10

منیلا (اُردو پوائنٹ اخبارتازہ ترین - اے پی پی۔ 22 ستمبر2025ء) فلپائن کے شمالی حصے میں سپر سمندری طوفان ’’راگاسا‘‘ کے باعث تیز ہواؤں اور شدید بارشوں کے پیش نظر 10 ہزار سے زائد افراد کو سکولوں اور ایمرجنسی مراکز سمیت محفوظ مقامات پر منتقل کر دیا گیا ہے ۔اے ایف پی کے مطابق سمندری طوفان ’’راگاسا‘‘ پیر کو فلپائن کے بابویاں جزائر سے ٹکرانے کی توقع ہے، یہ ویران جزائر تائیوان کے تقریباً 740 کلومیٹر جنوب میں واقع ہیں اور وہاں بھی انخلا جاری ہے۔

محکمہ موسمیات کے مطابق مقامی وقت کے مطابق صبح 11 بجے (0300 جی ایم ٹی) طوفانی ہوائوں کی رفتار 215 کلومیٹر فی گھنٹہ ریکارڈ کی گئی اور بعض اوقات ان کی رفتار 265 کلومیٹر فی گھنٹہ تک پہنچ گئی اور یہ مغرب کی سمت بابویاں جزائر کی طرف بڑھ رہا ہے۔

(جاری ہے)

کگایان صوبے کے ڈیزاسٹر چیف روئیلی ریپ سنگ نے کہا کہ ان کی ٹیم ممکنہ’’بدترین صورتحال‘‘ سے نمٹنے کے لیے تیار ہے۔

تائیوان میں محکمہ موسمیات نے ملک کے مشرقی حصے میں "انتہائی شدید بارش" کا امکان ظاہر کیا ہے۔ مقامی فائر ڈیپارٹمنٹ کے اہلکار جیمز وو نے بتایا کہ پنگ تنگ کے پہاڑی علاقوں میں انخلا جاری ہے، ہمیں زیادہ فکر اس بات کی ہے کہ نقصان دو سال پہلے آنے والے سمندری طوفان کوینو جیسا نہ ہو ۔طوفان کے پیش نظر منیلا ریجن سمیت 29 صوبوں میں پیر کو تعلیمی ادارے اور سرکاری دفاتر بند رہے۔ماہرین نے خبردار کیا ہے کہ انسانی سرگرمیوں سے پیدا ہونے والی موسمیاتی تبدیلی کے باعث طوفان زیادہ طاقتور ہو رہے ہیں۔