ا*ڈاکٹر عثمان انور سے سندھ پولیس کے زیر تربیت ڈی ایس پیز کی ملاقات

م*سی پی او دورہ: نوجوان افسران کو جدید پولیسنگ، ویلفیئر اور ایڈمنسٹریشن پر بریفنگ

منگل 23 ستمبر 2025 19:45

لاہور (اُردو پوائنٹ اخبارتازہ ترین - آن لائن۔ 23 ستمبر2025ء) سندھ پولیس کے دوسرے اسپیشلائزڈ ٹریننگ کورس کے زیر تربیت ڈی ایس پیز نے سنٹرل پولیس آفس کا دورہ کیا اور آئی جی پنجاب ڈاکٹر عثمان انور سے ملاقات کی۔آئی جی پنجاب نے سندھ پولیس کے زیر تربیت افسران سے ٹریننگ اور فیلڈ تجربات کے بارے میں دریافت کیا۔ اس موقع پر ڈی آئی جی ایس پی یو اینڈ ویلفیئر غازی محمد صلاح الدین نے افسران کو ویلفیئر، ڈسپلن، فنانس، آپریشنز اور انویسٹی گیشن سمیت مختلف برانچز کی ورکنگ کے بارے میں آگاہی دی۔

ڈاکٹر عثمان انور نے نوجوان افسران پر زور دیا کہ فیلڈ کے ساتھ ساتھ آفس مینجمنٹ اور ایڈمنسٹریشن کا تجربہ حاصل کرنا نہایت ضروری ہے۔ انہوں نے کہا کہ سندھ پولیس کے افسران سی پی او میں ٹریننگ کے بعد اپنے پروفیشنل کیریئر میں بہتر کارکردگی کا مظاہرہ کر سکیں گے۔

(جاری ہے)

آئی جی پنجاب نے زیر تربیت ڈی ایس پیز کو ہدایت کی کہ وہ دلجمعی اور لگن کے ساتھ ٹریننگ مکمل کریں اور اربن و رورل پولیسنگ کے تمام پہلوؤں پر مہارت حاصل کریں۔

انہوں نے مزید کہا کہ جدید ٹیکنالوجی کے مؤثر استعمال سے جرائم کی سرکوبی اور پبلک سروس ڈلیوری میں بہتری یقینی بنائی جا سکتی ہے۔زیر تربیت افسران نے آئی جی پنجاب کو فیلڈ ٹریننگ کے دوران حاصل ہونے والے تجربات اور مشاہدات سے آگاہ کیا اور مختلف سوالات بھی کیے۔اس موقع پر ایڈیشنل آئی جی ویلفیئر اینڈ فنانس عمران ارشد، ڈی آئی جی ٹریننگ راؤ منیر ضیاء، آر پی او سرگودھا ڈاکٹر شہزاد آصف، ڈی آئی جی ایس پی یو غازی محمد صلاح الدین، اے آئی جی آپریشنز زاہد نواز مروت، اے آئی جی ٹریننگ صبا ستار اور اے آئی جی ایڈمن ڈاکٹر اسد اعجاز ملہی سمیت دیگر افسران بھی موجود تھے۔