جاپان اوپن ٹینس مینز سنگلز، فرانسس ٹیافواور ڈینس شاپووالوف ابتدائی رائونڈ میں اپ سیٹ شکست کے بعد باہر

جمعرات 25 ستمبر 2025 11:49

ٹوکیو (اُردو پوائنٹ اخبارتازہ ترین - اے پی پی۔ 25 ستمبر2025ء) امریکا کے ٹینس کھلاڑی فرانسس ٹیافو جونیئر اور کینیڈین ٹینس سٹار ڈینس شاپووالوف جاپان اوپن ٹینس ٹورنامنٹ میں مردوں کے سنگلز مقابلوں کے ابتدائی رائونڈ میں اپ سیٹ شکست کے بعد ایونٹ سے باہر ہوگئے ہیں۔شکست کے بعد مایوسی کا شکار فرانسس ٹیافو نے اپنا ریکیٹ بھی کورٹ پر مار کر توڑ دیا۔

سپورٹس ویب سائٹ کے مطابق ہنگری کے ٹینس کھلاڑی اور کوالیفائر مارٹن فوکسوکس نے مینز سنگلز کے پہلے رائونڈ میچ میں امریکا کے ٹینس کھلاڑی فرانسس ٹیافو جونیئر کو اپ سیٹ شکست دی جبکہ دوسرے میچ میں جرمنی کے ٹینس کھلاڑی ڈینیئل آلٹمائر نے کینیڈین حریف کھلاڑی اور ایونٹ کے سیونتھ سیڈڈ ڈینس شاپووالوف کو 0-2 سیٹس سے اپ سیٹ شکست دے کر ایونٹ سے باہر کر دیا۔

(جاری ہے)

جاپان کے دارالحکومت ٹوکیو کے ایریک کولیزیم میں اے ٹی پی ٹینس ٹورنامنٹ جاری ہے جس میں شائقین ٹینس کو دلچسپ مقابلے دیکھنے کو مل رہے ہیں۔ٹوکیو کے ایریک کولیزیم میں اے ٹی پی ٹینس ایونٹ میں کھیلے گئے مینز سنگلز کے پہلے رائونڈ میچ میں ہنگری کے ٹینس کھلاڑی اور کوالیفائر مارٹن فوکسوکس نے عمدہ کھیل پیش کرتے ہوئے حریف امریکا کے ٹینس کھلاڑی فرانسس ٹیافو جونیئر کو 3-6، 1-6 اور 5-7 سے اپ سیٹ شکست دی۔

شکست سے دلبرداشتہ ہوکر فرانس ٹیافو نے اپنا ریکیٹ کورٹ پر مار کر توڑ دیا۔ایک اور میچ میں جرمنی کے ٹینس کھلاڑی ڈینیئل آلٹمائر نے شاندار کارکردگی کا مظاہرہ کرتے ہوئے کینیڈین حریف کھلاڑی اور ایونٹ کے سیونتھ سیڈڈ ڈینس شاپووالوف کو سٹریٹ سیٹس میں 5-7 اور 3-6 سے نہ صرف اپ سیٹ شکست دی بلکہ حریف کھلاڑی کو ایونٹ سے بھی باہر کر دیا۔