Live Updates

پاکستان فائنل جیت کر بھارت سے ہاتھ ملائے، یونس خان کا مشورہ

جمعرات 25 ستمبر 2025 12:40

کراچی(اُردو پوائنٹ اخبارتازہ ترین - این این آئی۔ 25 ستمبر2025ء)پاکستان کرکٹ ٹیم کے سابق کپتان یونس خان نے مشورہ دیا ہے کہ بھارتی ٹیم کے کھلاڑی ہاتھ نہیں ملا رہے لیکن گرین شرٹس فائنل جیت کر ان کے آگے ہاتھ بڑھائیں۔کراچی میں نیپا اسپورٹس کمپلیکس میں میڈیا سے گفتگو میں یونس خان نے کہا کہ سیاست سے باہر نکلیں اور ٹیم کے لیے کھیلیں، اپنے لیے نہیں ملک و قوم کے لیے کھیلیں۔

انہوں نے کہا کہ شاہین شاہ آفریدی ایشیاکپ میں بیٹنگ کر سکتے ہیں تو دوسرے پلیئرز کیوں نہیں کر سکتی شاہین میں آل راؤنڈر بننے کی صلاحیت ہے۔یونس خان نے کہا کہ پاکستان اور بھارت فائنل میں گئے تو پھر کیا ہی مزہ ہو گا، آپ جیت کر ثابت کریں کہ آپ بہترین اسپورٹس مین ہیں۔اُنہوںنے کہاکہ پاکستانی کرکٹ ٹیم میں مستقل مزاجی کا فقدان ہے، جیت کے لیے اچھا کھیلنا ضروری ہے، اچھی پلاننگ کے ذریعے میچز جیتے جاتے ہیں۔

(جاری ہے)

سابق کپتان نے کہا کہ بھارت کی ٹیم نہ ہی پاکستان کی ٹیم کمزور ہے، بھارتی ٹیم میں تبدیلیاں کم ہوتی ہیں، یہی اُن کا پلس پوائنٹ ہے۔انہوں نے کہا کہ بھارت کے کھلاڑیوں کو پتہ ہوتا ہے انہیں کھیلنا ہے، گرین شرٹس بھی زیادہ تبدیلیاں کر کے کمبی نیشن خراب نہ کرے۔یونس خان نے کہا کہ سیاست اور کھیل کو الگ ہونا چاہیے، بھارتی کرکٹرز کا ہاتھ نہ ملانا اسپورٹس مین اسپرٹ کے منافی ہے، وہ اپنی گورنمنٹ کی ہدایت پر ہاتھ نہیں ملا رہے ہیں۔

اُن کا کہنا ہے کہ اگر ہماری حکومت بھی کہے کہ آپ نے ہاتھ نہیں ملانا تو شاید ہم بھی نہ ملائیں، ہمیں اپنی حکومت کی ہدایت پر عمل کرنا ہو گا۔سابق کپتان نے کہا کہ بابر اعظم اور محمد رضوان اچھے اور با صلاحیت کرکٹرز ہیں، افغانستان کے ساتھ بطور بیٹنگ کنسلٹنٹ کام کرنے کا تجربہ اچھا رہا، وہاں بڑی عزت ملی۔انہوں نے کہا کہ افغان ٹیم کے زیادہ تر کھلاڑی میرے سامنے بڑے ہوئے، کوئی بھی ٹیم ایشیاء کی نمبر ون یا نمبر ٹو نہیں، جس دن جو ٹیم جیتے گی وہی نمبر ون پوزیشن کی حق دار ہے۔