Live Updates

بھارتی کرکٹ بورڈ سے صاحبزادہ فرحان کی سیلیبریشن ہضم نہ ہو سکی

جمعرات 25 ستمبر 2025 12:40

نئی دہلی (اُردو پوائنٹ اخبارتازہ ترین - این این آئی۔ 25 ستمبر2025ء) جاری ایشیا کپ کے دوران پاکستان اور بھارت کے درمیان کھیلے جانے والے میچز میں کارکردگی سے زیادہ تنازعات خبروں کی زینت بن گئے ،بھارتی کرکٹ بورڈ سے صاحبزادہ فرحان کی سیلیبریشن ہضم نہ ہو سکی۔بھارتی میڈیا نے دعویٰ کیا کہ بھارتی کرکٹ بورڈ (بی سی سی آئی) نے پاکستانی کھلاڑیوں حارث رؤف اور صاحبزادہ فرحان کے خلاف انٹرنیشنل کرکٹ کونسل (آئی سی سی) میں شکایت درج کرا دی ہے۔

شکایت میں بھارتی بورڈ نے صاحبزادہ فرحان کی جانب سے ففٹی اسکور کرنے پر اپنائے گئے جشن کے انداز پر اعتراض اٹھایا ہے۔اس کے علاوہ سپر فور مرحلے کے دوران حارث رؤف پر بھی اشتعال انگیز اشارے کرنے کا الزام لگایا ہے۔حارث رؤف نے بھارتی تماشائیوں کی ہلڑ بازی کے جواب میں ہاتھ سے چھ اور صفرکا اشارہ کیا تھا جس پر بھارتی بورڈ نے اعتراض اٹھایا ہے،پاکستانی فاسٹ بولر کے اس اشارے نے بھارتیوں کو مئی میں ہونے والی پاک بھارت جنگ دلا دی جب پاک فضائیہ کے شاہینوں نے پاکساتنی حدود میں داخل ہونے والے بھارتی طیاروں کو دھول چٹا دی تھی۔

(جاری ہے)

ڈاگ فائیٹ میں انڈیا نے چھ طیارے کھوئے تھے۔بھارتی میڈیا نے مزید دعویٰ کیا کہ بی سی سی آئی نے بدھ کے روز ای میل کے ذریعے آئی سی سی کو شکایت درج کرائی ہے۔اگر کونسل نے شکایت کو میرٹ پر سمجھا تو حارث رؤف اور صاحبزادہ فرحان کو وضاحت جمع کرانے کے لیے نوٹس بھیجے جائیں گے،الزامات کی تحریری طور پر تردید کرنے پر دونوں کھلاڑیوں کو آئی سی سی کے ایلیٹ پینل کے ریفری رچی رچرڈسنکے سامنے پیش ہونا پڑے گا۔ یاد رہے کہ بھارت کا یہ اقدام پی سی بی کی جانب سے بھارتی بلے باز سوریا کمار یادو کے خلاف شکایت درج کرانے کے جواب میں اٹھایا گیا ہے۔سوریا کمار نے چودہ ستمبر کو ہونے والے میچ میں آپریشن سندور اور پہلگام حملے کا ذکر کر کے کھیل میں سیاست لانے کی کوشش کی تھی۔