تاریخی اور ثقافتی ورثے تخت بھائی کو روشنیوں کی آبشاروں سے رنگ دیا گیا

جمعرات 25 ستمبر 2025 20:00

پشاور (اُردو پوائنٹ اخبارتازہ ترین - اے پی پی۔ 25 ستمبر2025ء) تاریخی اور ثقافتی ورثے تخت بھائی کو روشنیوں کی آبشاروں سے رنگ دیا گیا ہے۔ محکمہ سیاحت خیبرپختونخوا تر جمان کے مطابق مردان کی سنگلاخ پہاڑیوں پر ایستادہ تخت بھائی، جو صدیوں سے یونیسکو کے عالمی ورثے کی حیثیت سے خاموش داستان گو تھا، آج جدید روشن کاری کے ذریعے ایک تابندہ مینارِ ثقافت بن کر جگمگا رہا ہے۔

یہ منظر یوں ہے گویا وقت نے اپنی شکستہ دیواروں پر چراغ رکھ دئیے ہوں اور تاریخ نے خود کو نئے اجالوں کے سپرد کر دیا ہو۔یہ روشنی محض چراغاں نہیں بلکہ ایک نئی صبح کی بشارت ہے۔ بدھ مت کی یہ قدیم خانقاہ اب رات کی سیاہی میں ایسے دمک رہی ہے جیسے فلک پر سے کوئی ستارہ زمین پر اتر آیا ہو۔ تخت بھائی کا ہر ستون اور ہر اینٹ اب اجالے کی زبان میں محبت، امن اور تہذیب کی وہ کہانیاں سنا رہا ہے جو وقت کے زنگ آلود اوراق میں دفن تھیں۔

(جاری ہے)

یہ منصوبہ کائٹ پراجیکٹ کے تحت عالمی بینک کے تعاون سے مکمل کیا گیا ہے، جو ماضی اور حال کے درمیان ایک سنہری رشتہ قائم کرتے ہوئے اس ورثے کو جاوداں بنا رہا ہے۔ تخت بھائی کی روشن کاری نہ صرف سیاحوں کے دلوں میں حیرت کے دیپ جلائے گی بلکہ محققین کے لیے بھی فکر و تحقیق کی نئی راہیں روشن کرے گی۔صوبائی حکومت نے جس محبت اور وابستگی سے اس ورثے کو سنوارا ہے وہ آنے والی نسلوں کے لیے امید کا چراغ ہے۔

سیکرٹری محکمہ ثقافت، سیاحت، آثارِ قدیمہ و عجائب گھر خیبرپختونخوا، ڈاکٹر عبدالصمد نے کہا کہ تخت بھائی کی روشن کاری نہ صرف ماضی کو خراجِ تحسین ہے بلکہ مستقبل کے لیے ایک زندہ علامت ہے۔ یہ روشنی اعلان کر رہی ہے کہ تاریخ کی روح کبھی مدھم نہیں پڑتی، وہ بس نئے رنگ اور نئے نغمے تلاش کرتی ہے۔