پنجاب میں سیاحوں کے تحفظ، آسانی اور آسائش کیلئے مزید کام کرنے کی ضرورت ہے‘مریم نوازشریف

ہفتہ 27 ستمبر 2025 20:06

لاہور(اُردو پوائنٹ اخبارتازہ ترین - این این آئی۔ 27 ستمبر2025ء) وزیر اعلی پنجاب مریم نوازشریف نے کہاہے کہ سیاحت کا عالمی دن منانے کا مقصد مقامی و عالمی سطح پر سیاحت کی اہمیت کو اجاگر کرنا ہے، دنیا میں بے شمار ممالک سیاحت کے ذریعے اپنی معیشت کو تقویت دے رہے ہیں ،پنجاب سیاحتی لحاظ سے مالا مال ہے،پنجاب کی خوبصورتی اپنی مثال آپ ہے ،پنجاب میں سیاحوں کے تحفظ، آسانی اور آسائش کے لیے مزید کام کرنے کی ضرورت ہے ، حکومت سیاحوں کو ہر ضروری سہولت فراہم کر رہی ہے، پنجاب کی سیاحتی پوٹینشل سے مزید استفادہ کرنے کے لیے منصوبہ بندی کے تحت اقدامات کر رہی ہے،سیاحت بہترین ذریعہ معاش ہے، مقامی لوگوں کو روزگار فراہمی میں اہم کردار ادا کرے گی۔

وزیراعلی مریم نوازشریف نے سیاحت کے عالمی دن پراپنے پیغام میںکہاکہ سیاحت کے ذریعے پنجاب کی معیشت کو مضبوط کرنے کے لئے پر عزم ہیں۔

(جاری ہے)

پاکستان قدرتی خوبصورتی، مذہبی سیاحت اور تاریخی مقامات سے مالامال ہے۔پاکستان دنیا کی قدیم ترین تہذیب و ثقافت کا امین ہے۔ سیاحت کے فروغ سے دنیا کے سامنے پاکستان کے آثار قدیمہ کو متعارف کرائیں گے ۔پنجاب میں نئے سیاحتی مقامات متعارف کرائے جا رہے ہیں ۔

وزیراعلی مریم نوازشریف نے کہاکہ پنجاب کے سیاحتی مقامات غیر ملکی اور ملکی سیاحوں کے لئے یکساں دلچسپی کا باعث ہیں، سیاحت سے نہ صرف مقامی ثقافت بلکہ معیشت بھی فروغ پاتی ہے ۔سیاحت کے فروغ سے مقامی لوگوں کو روزگار کے مواقع ملتے ہیں۔ وزیراعلی مریم نوازشریف نے کہاکہ صوبہ بھر میں سیاحتی مقامات میں ضروری سہولتوں کی فراہمی پر توجہ دی جا رہی ہے۔ مربوط ٹورازم پالیسی کے تحت پنجاب میں نئے سیاحتی مقامات ڈویلپ کئے جارہے ہیں ۔