راولپنڈی ،میٹرک سیکنڈ سالانہ امتحانات 2025 کا آغاز 29 ستمبر سےشروع ہو ں گے،تمام انتظامات مکمل کر لیے گئے

جمعہ 26 ستمبر 2025 14:00

راولپنڈی (اُردو پوائنٹ اخبارتازہ ترین - اے پی پی۔ 26 ستمبر2025ء) تعلیمی بورڈ راولپنڈی کے زیر اہتمام امتحان میٹرک سیکنڈ سالانہ 2025 بروز سوموار 29 ستمبر سے شروع ہو رہے ہیں۔ اس سلسلے میں تمام انتظامات مکمل کر لیے گئے ہیں اور امیدواران کو رول نمبر سلپس بھجوا دی گئی ہیں۔ ریگولر امیدواران کی رول نمبر سلپس ان کے اداروں کے پورٹل پر جبکہ پرائیویٹ امیدواران کی رول نمبر سلپس ان کے داخلہ فارم پر درج پتہ جات پر ارسال کر دی گئی ہیں۔

مزید سہولت کے لیے رول نمبر سلپس بورڈ کی ویب سائٹ www.biserawalpindi.edu.pkپر بھی اپ لوڈ کر دی گئی ہیں جنہیں امیدواراپنا ب فارم نمبر یا آن لائن داخلہ فارم نمبر درج کر کے ڈاؤن لوڈ کر سکتے ہیں۔چیئرمین بورڈ محمد عدنان خان اور کنٹرولر امتحانات تنویر اصغر اعوان نے مشترکہ اعلامیہ میں بتایا کہ امتحان کے لیے مجموعی طور پر 44 امتحانی مراکز تشکیل دیے گئے ہیں جن میں 18 بوائز، 12 گرلز اور 14 مشترکہ مراکز شامل ہیں۔

(جاری ہے)

ضلعی سطح پر کنٹرول روم قائم کر دیے گئے ہیں اور مرکزی کنٹرول روم بورڈ کمپلیکس کنڈکٹ برانچ میں قائم ہے۔امتحانی عمل کی شفاف نگرانی کے لیے سپیشل اسکواڈ، چیئرمین اسکواڈ اور موبائل انسپکٹر تعینات کر دیے گئے ہیں۔ 44 سپرنٹنڈنٹ اور 58 ڈپٹی سپرنٹنڈنٹ اپنی ذمہ داریاں ادا کریں گے۔چیئرمین تعلیمی بورڈ محمد عدنان خان نے کہا کہ وزیرِاعلیٰ پنجاب مریم نواز کے ویژن اور حکومت پنجاب کی زیرو ٹالرینس پالیسی کے تحت میٹرک سیکنڈ اینول امتحان 2025 کو فول پروف بنایا گیا ہے۔

انہوں نے کہا کہ یہ ٹاسک صوبائی وزیرِ تعلیم رانا سکندر حیات کی سرپرستی میں مکمل کیا جائے گا۔کنٹرولر امتحانات تنویر اصغر اعوان نے ہدایت کی کہ تمام امتحانی عملہ بروقت اپنی ڈیوٹی پر رپورٹ کرے، کسی قسم کی غفلت یا کوتاہی ہرگز برداشت نہیں کی جائے گی اور خلاف ورزی کرنے والوں کے خلاف سخت تادیبی کارروائی عمل میں لائی جائے گی۔\378