کولمبین صدر نے دنیا بھر سے مشترکہ فوج بنانے کی اپیل کردی

ہمیں ایسی طاقتور افواج درکار ہیں جو غزہ میں نسل کشی کو قبول نہ کریں،خطاب

پیر 29 ستمبر 2025 13:55

کولمبین صدر نے دنیا بھر سے مشترکہ فوج بنانے کی اپیل کردی

بگوٹا(اُردو پوائنٹ اخبارتازہ ترین - این این آئی۔ 29 ستمبر2025ء)کولمبیا کے صدر گستاوو پیٹرو نے فلسطین کے دفاع کے لیے دنیا بھر کی اقوام سے ایک مشترکہ فوج بنانے کی اپیل کی ہے۔اقوامِ متحدہ کی جنرل اسمبلی سے خطاب کرتے ہوئے صدر گستاوو پیٹرو نے کہا کہ غزہ کے مسئلے پر سفارتکاری ناکام ہو چکی ہے۔ ہر دن، ہر لمحہ معصوم بچوں اور شہریوں پر بمباری ہو رہی ہے اور سلامتی کونسل کی قراردادیں ویٹو کر دی جاتی ہیں۔

(جاری ہے)

انہوں نے مزید کہا کہ اب وقت آ گیا ہے کہ جنرل اسمبلی کے ذریعے امن کے لیے متحد ہو کر ایک امن فورس قائم کی جائے جو نسل کشی کو روک سکے۔اِن کا کہنا تھا کہ ہمیں ایسی طاقتور افواج درکار ہیں جو نسل کشی کو قبول نہ کریں۔گستاوو پیٹرو نے ایشیا، لاطینی امریکا اور یورپ کی عوام اور افواج کو دعوت دیتے ہوئے یہ بھی کہا کہ ہم نے بہت باتیں سن لیں، اب وقت آ گیا ہے کہ بولیوار کا نعرہ آزادی یا موت دہرایا جائے۔