پارلیمانی سیکرٹری اطلاعات و ثقافت پنجاب کی زیر صدارت انسداد ڈینگی کے حوالے سے اجلاس

پیر 29 ستمبر 2025 20:30

راولپنڈی (اُردو پوائنٹ اخبارتازہ ترین - اے پی پی۔ 29 ستمبر2025ء) پارلیمانی سیکرٹری اطلاعات و ثقافت پنجاب شازیہ رضوان کی زیر صدارت ڈی سی آفس راولپنڈی میں انسداد ڈینگی کے حوالے سے ایک اہم اجلاس منعقد ہوا ۔اس دوران ڈینگی کی موجودہ صورتحال، جاری انسداد ڈینگی اقدامات اور آئندہ حکمتِ عملی پر تفصیلی غور و خوض کیا گیا۔ شازیہ رضوان نے کہا کہ حکومت پنجاب کی ہدایات کے مطابق ڈینگی کے تدارک کے لیے ہنگامی بنیادوں پر اقدامات کیے جا رہے ہیں۔

انہوں نے متعلقہ محکموں کو سختی سے ہدایت کی کہ اسپتالوں میں ڈینگی مریضوں کے لیے علیحدہ وارڈز، ادویات اور طبی عملے کی حاضری یقینی بنائی جائے۔ڈپٹی کمشنر ڈاکٹر حسن وقار چیمہ بتایا کہ تمام سرکاری و نجی اداروں میں ڈینگی سرویلنس ٹیمیں سرگرم ہیں۔

(جاری ہے)

قبرستانوں، نرسریوں، تعلیمی اداروں، مارکیٹوں اور رہائشی علاقوں میں باقاعدہ اسپرے اور لاروے کی تلفی کے اقدامات جاری ہیں۔

شازیہ رضوان نے عوامی آگاہی پر زور دیتے ہوئے کہا کہ ڈینگی کے خاتمے کے لیے انتظامیہ کے ساتھ ساتھ عوام کا تعاون بھی ناگزیر ہے۔ شہری گھروں اور گلی محلوں میں صفائی ستھرائی کا خاص خیال رکھیں اور پانی جمع نہ ہونے دیں۔ انہوں نے مزید کہا کہ ڈینگی مہم میں کوتاہی برداشت نہیں کی جائے گی۔غفلت برتنے والے افسران اور عملے کے خلاف سخت کارروائی عمل میں لائی جائے گی۔

انہوں نے کہاکہ حکومت پنجاب پر عوامی مسائل کے حل کے لیے دن رات کوششیں جاری ہیں۔ ڈینگی سے بچاؤ کے اقدامات کو عوامی تعاون کے ساتھ مزید موثر بنایا جائے گا۔ خواتین اور نوجوانوں کی ذمہ داری ہے کہ وہ آگے بڑھ کر اپنے گھروں اور محلوں میں ڈینگی کے خلاف آگاہی پھیلائیں۔ اجلاس میں اس بات پر بھی زور دیا گیا کہ ڈینگی کے خلاف مہم کو تعلیمی اداروں اور کمیونٹی کی سطح پر مزید مضبوط کیا جائے گا تاکہ یہ مرض جڑ سے ختم کیا جا سکے۔اجلاس کے اختتام پر عوامی نمائندوں اور افسران نے اس عزم کا اعادہ کیا کہ راولپنڈی کو ڈینگی سے محفوظ بنانے کے لیے تمام وسائل اور توانائیاں بروئے کار لائی جائیں گی اور عوامی سہولت کو ہمیشہ ترجیح دی جائے گی۔